Vawiin Home Minister Pu R. Lalzirliana kaihhruaina hnuaia CS Conference Hall-a Co-ordination Committee on Traffic Management thukhawm chuan Aizawl khawpuia Traffic Jam tiziaawm turin a hnuai a mi ang hian hmalakna tur hrang hrang a rel a. Hengte hi khawpui chhunga chengte nawmsak tlanna tur a ni tih hre rengin mipui hriatthiamna leh tawiawmna Committee chuan a ngen nghal a ni.

Kumin December ni 1 atangin Aizawl Municipal Area huamchhunga lirthei nei zawng zawng chu garage nei vek tura beisei an nih angin hriattirna pawh chanchinbu leh local cable channel kaltlangin tihchhuah thin a ni a. Local Council tin ten anmahni area chhung theuhvah lirthei awmzat leh garage nei leh neilo uluk taka chhinchhiah chu hmalakna hmasa ni se tiin meeting chuan a rel a, Traffic Police-ten awlsam zawka lirthei garage nei leh neilo an thliar hran theih nan a bik a siam sticker bel ni se tia rel a ni bawk.

Aizawl khawpui chhunga nitin lirthei tlan zat titlem tura hmalakna pakhat atan October thla atangin a enchhin nan mimal leh sawrkar lirthei zawng zawng chu a chhawka tlan ni se tiin Committee hian a rel a. Lirthei number a digit tawp ber chu thla khat a ni indawt a an number thlen apiangin an tlanlo ang a; Entirnan, registration number 1234 chu a digit tawp ber 4 a nih angin ni 4, ni 14 leh ni 24 ah te chuan a chawl ang.

Kawngsir a lirthei dah/park hi khawpui chhung tawt chhan langsar tak a nih avangin kawngsir parking area ni lova lirthei park te chu dan awmsa tlawhchhan in hnuhsawn (tow) theih annih thu vawiin meeting-ah hian sawi niin, hetianga inhnuhsawn sak ngai lova lirthei neituten hun inpek chhunga a dahna tur an ngaituah hman ngei an duh thu sawi a ni. Committee hian ‘towed vehicle’ dahna tur pawh a rel nghal a ni. Lirthei lian chi 407 leh a chunglam chu an dinna tur khawpui dai remchangah siam tura rel a ni bawk.

Meeting chuan sorkar hnathawk lirthei kawl thei chinte pawhin mimal lirthei neite ang bawkin garage an nei tur a ni a, an nei theilo a nih chuan office-ah emaw hmun dangah park-na tur an zawn a tul tih a rel a ni.

Co-ordination Committee on Traffic Management chuan heng hmalakna te hi enzui turin committee a ruat a, Addl. Secretary Home, SP Traffic, AMC Councillor, Transport Director leh I&PR Director-te member atan ruat an ni.

Vawiin meeting-ah hian Chairman Minister Pu R. Lalzirliana leh Finance, Planning etc. Minister Pu Lalsawta, Chief Secretary Pu Lalmalsawma leh member dang an tel kim hle a ni.