Vawiin khan ramchhung hmundangte rualin Chhimveng YMA Hall, Mamit-ah Zirtirtute Ni 2017  chu ropui taka hman a ni. Pi Lalbiaksangi, District Bawrhsap chuan khuallian niin he hun hi a hmanpui. 

Pi Lalbiaksangi District Bawrhsap chuan zirtirtute chu hna ropui tak thawktu an ni tiin ram hruaitu ropui tak takte chher chhuaktu chu zirtirtute an ni a ti. A chher chhuaktu a zirin an chherchhuahte erawh a in an loh theih thu a sawi, tuna zirtirtute chu an naupangte an zirtir kawngah aia upate zahthiam leh nundan mawi hrang hrang hriat nachang hre tura zirtir lehzual an ngaih thu sawiin hriselna lamah pawh  mawhphurhna thui tak neitu chu zirtirtute tho an ni a ti. Kalkhawm zirtirtute zawng zawng zahna  chibai bukin zirtirtu hna lo chawlhsan tawhtute zawng zawng pawh zahna chibai a buk bawk a ni. 

He hunah hian Pu H. Lianzela, Addl D.C kaihruaina-in  District Level Teacher’s Day Committee 2017,  in Mamit District chhunga Zirtirtu tha thlan chhuah a chawimawina hlan ni se ti-a a lo rel tawhin angin, Teacher of the Year Award 2017  dawng turin heng mite hi thlan chhuaha chawimawina hlan an ni,  Pu Pauline Lalneihmawia Pulamte, Primary Teacher Rajiv Nagar, Pu H. Lalthansanga, Govt High School W. Phaileng, Pu Lalnuntluanga, Govt Tuahzawl Middle School leh Pu C. Vanlalhriata Govt Adhoc Aided High School Hmunpui te thlanchhuah niin, anni hi tehfung hrang hrang hmanga teh niin Category hrang pali atanga thlan chhuahte an ni a. Chawimawina thuziak leh pawisa fai cheng 5000 hlan an ni. 

Zirtirtute Ni puala inkhwm hi Pi Lalnunthari, District Education Officer, Mamit chuan kaihruaiin Pu Lalropuia President MZP Hqrs Mamit leh Teachers of the Year Award 2017 dawngtute atangin thusawi ngaihthlak a ni a Zirtirtu hna lo chawlhsan tawh mi 9 te hnenah chawimawina hlan niin, kalkhawm zirtirtu zawng zawngte chawimawina pangpar hlan an ni bawk. 

Pu K. Lalthangkima, H.A,  SDEO Office chuan Education Minister Message chhiarchhuahna a nei bawk. 

Pi Gracy L. Bawitlung, CJM chuan Mamit District Legal Services Authority District chhunga zirlaite hnena Essay inziahsiak an buatsaih chu  lawman semna a nei a, he competition hi Primary Level atanga College a then niin lawmman pakhatna dawngtu  hian Rs 10000/- , pahnihna in Rs 7000/- leh pathumna in Rs 5000/- an dawng a, lawmman hian chawimawina thuziak a keng tel bawk. Level tinah pakhatna atanga pathumna bakah Consolation Price dawngtu mi 10 theuh an awm bawk a ni.  

He hunah hian Mamit khawpui chhunga School hrang hranga zirtirtute, zirlaite bakah District chhung atanga zirtirtu sawmbikte telin zirlai naupangte atangin zaithiam leh lamthiam te’n hun an hmang bawk a ni.