Vawiin dkhan Mizo Zirlai Pawl, Reiek Sub Headquarters buatsaihin Reiek Community Hall-ah ‘Zirtirtute Ni’ hman a ni a, he  hun hi School Education Minister Pu H. Rohluna’n khuallian niin a hmanpui.

Khuallian Pu H. Rohluna chuan thu sawiin ‘Zirtirtute Ni’ hi ramchhungah chauh ni lo khawvel hmun hrang hrangah hman thin a ni a, ram changkang apiangah zirtirtute hlutna hi an hre chiang a, an pualin hun an hmang uar thin hle a ni, a ti a. Ram leh hnam siamthatna atana hmahruaitu zirtirtute Ni bik lo thlengah hian duhsakna a hlan. Zirtirtute hian mi thiam tak tak an chher chhuak a, tun dinhmun min hruai thlengtu an nih avangin zah an phu a, an tel lo hian hnam a ding chhuak thei lo, a ti a. Mahni inlum chhuahsana Zoram dung leh vanga mahni hrehawm pawisa lova rim taka thawktute chungah lawmthu sawiin, ram leh hnam siamthat nan inpekna thar nena thawk zel turin a chah bawk.

Pu H.Rohluna chuan zirtirtute dinhmun hi an pawimawh em avangin an dinhmun pawh siam that zel a ni, a ti a. Sorkar hmalaknain Sorkar sikula zirtirtu thawklai la training lo te pawh training tir mek an ni a, chutihrual chuan sorkar sikul chauh ni lo private school-a thawk zirtirtu zawng zawngte pawh sorkar laipuia Ministry of HRD thuchhuak leh Right To Education dan zulzuiin an training a ngai tawh dawn a, hemi atan hian National Institute of Open Schooling(NIOS) -ah tunthla September ni 15 thlenga inziaklut ngei turin a hrilh bawk. Minister chuan Sorkar sikul  hrang hrang thuamthatna turin NABARD leh NEDP atangin sum hmuh a nih thu leh heng sum hmang hian a hma lama hna thawk thei tura tan lak mek a ni, a ti a. Primary leh Middle School-a zirtirtu indaihlohna tihziaawm nan Primary School zirtirtu 100 leh Middle School zirtirtu 60 la turin sorkarin hma a lak mek thu a sawi bawk.

MZP, Reiek Sub Headquarters hian ‘Teachers Day’ pualin September ni 2, 2017 khan Reiek khawchhunga zirlai zawng zawngte tan Sports an buatsaih tawh a. He intihsiaknaa tithate hnenah hian sports award hlan a nih bakah Reiek khawchhunga zirtirtu tha ‘Teacher of the Year’ thlang chhuakin Pi Lalchhuanawmi, Teacher, Modern Middle School hnenah chawimawina an hlan a. Kumina zirlai hlawhtling mi 3 hnenah chawimawina an hlan bawk. Vawiin Reiek-a Zirtirtute Ni lawmnaah hian Reiek BDO Pi S.T.Lalvensangi, Education Department-a Officer te, Reiek khawchhunga zirtirtute leh zirlai zawng zawngte bakah tlawmngai pawl hrang hrangte an tel kim hle a ni.