2831/2022-2023
Hnahthial the 28th November, 2022 - Commerce & Industries Department changtu Minister Dr R. Lalthangliana chuan vawiin khan cheng nuai 846 senga ruahman tur Integrated Industrial Promotion Centre (IIPC) tur Hnahthial Electric Vengah lungphum a phum.

Hemi puala inkhawm, Electric Veng GSA Hall, Hnahthiala neihah Commerce & Industries Minister Dr R. Lalthangliana chuan Hnahthial District ti hmasawn turin sawrkarin chak takin hma a la zel a ni tiin IIPC Hnahthial chu ruhrel liantham leh kawng hrang hranga hmasawnna thlentu ala ni dawn a ni, a ti a. IIPC Hnahthial kaltlangin handloom leh industry dangte siam chhuah hralhchhuah thin anih dawn bakah he Centre atang hian Border Haat, Thingsai leh ICP, Kawrpuichhuah kaltlangin kuthnathawktute tharchhuah leh industry te siamchhuah ram dangah thawn chhuah thin a ni dawn a ni, a ti a. IIPC Hnahthial hlawhtling taka din anih theihnan ruahmanna te lo tawiawma sawrkar lo finchhuah thin turin Hnahthial mipuite a sawm a. Hnahthial District a hmasawnna hna kal mekte sawilangin Pangzawlah solar water supply scheme cheng vaibelchhe 17 sengin kalpui mek niin Mizoram chhim lam inkalpawhna atana pawimawh tak Tuipui D lei siam tha turin hmalakna kalpui mek niin tun dinhmunah Revenue Department atangin clearance nghah mek a ni, a ti a. Hemi bakah hian sawrkar Department-te tha tih chak nan Department hrang hrang office leh ruhrel dang sak hna kalpui mek zel a ni, a ti a. Sawrkar hmalaknate phur taka anlo tawiawm thin avangin Hnahthial khawtlang hruaitute, tlawmngai pawlte leh mipuite chungah lawmthu a sawi bawk a ni.

Lunglei HPC Vice Chairman Pu Lawmawma Tochhawng pawhin thu sawiin khawvel ram changkang leh hmasawnte hlawhtlinna bulpui ber pakhat chu industry changtlung tak an neih avang a ni tiin IIPC Hnahthial chu Mizoram hmasawnna atana hmanraw pawimawh tak ala ni zel dawn a ni, a ti a. Hnahthial District in hun reilote chhungin hmasawnna tam tak an hmu chu a lawmpui takzet thu sawiin IIPC Hnahthial chu hmasawnna rahbi thar kaina thlentu anih ngei theihnan District mipuite duhsakna a hla n a ni.

Commerce & Industries Director Pi Florence Zotluangpuii chuan IIPC Hnahthial sak tur chungchang report a pe a. Integrated Industrial Promotion Centre (IIPC) hi Mizoram atan a hmasa ber tur a ni a. Cheng nuai 846 senga Hnahthial Electric Venga ruahman tur niin a building ah hian basement, ground floor leh 1st floor a awm dawn a. He IIPC ah hian guest room pali (4), chowkidar room, motor pasarih (7) lenna parking, mi 250 lenna auditorium, green room, cafetaria, expo stalls engemzawzat a awm dawn a, Expo leh Exhibition lian tham te pawh he building ah hian a neih theih dawn a ni.

Vawiin program-ah hian Hnahthial DC Pu R. Lalremsanga chuan kalkhawmte lawmna thu sawiin Cultural program neih a ni a. Serchhip DC Pi Nazuk Kumar, Hnahthial SP Pu Vineet Kumar leh District head of office te leh Pu Dawngliana, Member, H&TE Board leh Hnahthial mipui thahnem tak an tel a ni. Pu K. Lalhmingliana, Addl Secretary, Commerce & Industries chuan lawmthu sawina hun a hmang a ni.