No.4122/2021-2022 

Aizawl, the 26^thFebruary 2022 : Commerce & Industries (C&I) Minister Dr R Lalthangliana chuan vawiin khan Electric Veng, Lungleiah NABARD sum cheng nuai 1082.93 senga ruahman Agri-Marketing & Training Infrastructure Building a hawng.

Hawnna inkhawm Commerce & Industries Department Commissioner & Secretary, Pi Esther Lal Ruatkimi kaihhruaiah Dr R Lalthangliana chuan Lunglei khawpui chhunga hmasawnna ruhrel liantham, khawtlang tana chhenfakawm tak leh eizawnna kawnga tangkai taka hman theih tur Agri-Marketing & Training Infrastructure Building zawhfel a ni chu lawmawm tiin a buaipuitu Commerce & Industries thawktute, building sa tu te leh Electric Veng Lunglei khawtlang te chungah lawmthu a sawi a. C&I Department hnuaiah hmalakna hrang hrang kalpui mek zel anih thu sawiin Lunglei Supermarket sakna tur cheng nuai 1400 NEC atanga sanction hmuh anih thu sawiin Bangladesh ram nena kan insumdawn tawnna atana ruahman Integrated Check Post (ICP), Kawrpuichhuah, Tlabung  ti hlawhtling turin Department chuan theihtawp a chhuah mek zel thu a sawi a ni.

A Department chan dangte hnuaia hmalaknte pawh sawilangin Minister chuan MZU Southern Campus atan DPR cheng vaibelchhe 400 sawrkar laipuiah thehluh tawh niin chak taka bawhzui mek a ni a, MZU Southern Campus tana hman lailawk tur Engineering College building chei that hna pawh thawh mek a ni, a ti a. Civil Hospital Lungleia Trauma Centre sak pawh zawh fel thuai beisei anih thu sawiin Multipurpose Laboratory Building, NEC sum cheng nuai 300 a ruahman mek pawh nakum kum tir lama zawhfel beisei anih thu a sawi. Lunglei Municipal Council (LMC) chungchang pawh sawiin Minister chuan Municipal body chak tak enkawlna hnuaiah Lunglei khawpui chuan kawng hrang hrangin hmasawnna a nei dawn a ni, a ti.

He huna khualzahawm Lunglei HPC Vice Chairman Pu Lawmawma Tochhawng chuan Agri-Marketing & Training Infrastructure Building hawn theiha peih fel a ni ta chu Pathian malsawmna ropui tak a ni tiin he hmasawnna ruhrel neih theihna tura sulsutute thawhrimna leh thahnemngaihna rah a ni, a ti a. He building ti hlawhtling tura bultan tu Pu Joseph Lalhimpuia chungah leh a hmun phal taka petu Electric Veng YMA te chungah lawmthu a sawi a ni.

He building sak enkawltu AIE Constructions, Tuikhuahtlang, Aizawl atangin Technical Report ngaihtlak a ni a. Agri-Marketing & Training Infrastructure hi NABARD, RIDF XXIII hnuaia project niin total project cost hi Rs. 1082.93 lakhs ani a. Hna hi 05/10/2018 ah thawh tan  a ni. A building plinth area hi 574.875 Square metres niin building hi floor nga (5) a sak a ni a. First floor hi Agriculture leh marketing lama training leh awareness centre atan ruahman niin mihring 300 vel leng tura hisap a ni. Ground floor ah hian guest room, conference/meeting room te awmin Basement I ah hian mi 78 lenna market area bakah market office ruamhan niin Basement II ah mi 85 lenna market area niin Basement III hi motor 25 lenna parking area-a ruahman a ni.