3852/2022-2023
Aizawl, the 15th March 2023: Vawiin khan Pi Laltanpuii, Zozia Silk & Handloom hnenah National Merit Certificate Award hlan a ni a. He hunah hian Commerce & Industries changtu Minister Dr. R. Lalthangliana chu khuallian niin chawimawina hi a hlan a, Sericulture changtu Minister Er. Lalrinawma chuan a telpui bawk a ni.
Silk Puanchei’ tah kawnga a thiamna leh hnathawhthat avangin Ministry of Textiles, Government of India hnuaia Development Commissioner for Handloom (DC Handloom) chuan Pi Laltanpuii hnenah National Merit Certificate Award hi a hlan a. A award dawn kum hi 2018 a ni a, hripui leng avangin 2023 hian a dawng kim thei ta chauh a ni. Zofate zingah Handloom lama National Award dawng thei pahnihna niin, Pi Zodinpuii (L), Tuikhuahtlang in kum 1988-a a dawn hnu a, dawng leh thei hmasa ber a ni a. Award hian Certificate leh sumfai cheng 75000 a keng tel a ni.
Directorate of Sericulture Conference Hall, Chaltlanga Award hlanna hunah hian thusawiin Dr. R. Lalthangliana chuan Pi Laltanpuii’n rampum huap chawimawina a dawng thei chu lawmawm a tih thu leh a lawmpui takzet thu a sawi a. Pi Laltanpuii inzir zel peihna leh taimakna chu a entawntlak takzet a ni tiin, a hlawhtlinna chuan midangte a fuihphur a beisei thu a sawi bawk. Minister chuan Commerce & Industries leh Sericulture-te chu department inhnimhnai tak, inmamawh leh inchawimawi tawn thin an ni, a ti a. Mizo fate chu tihtakzeta an beih chuan thil thiamchak tak an nih thu leh International Market thleng phak tura ngaihtuahna seng zui zel turin kalkhawmte chu a fuih a. Vawiina kalphung aia changkang leh tha zawka kal theih tum tur leh khawvel changkanna ang zela inher rem tura ngenin, daihrei leh teirei peih zel turin a chah nghal bawk a ni.
Sericulture Minister Er. Lalrinawma pawhin thusawiin a Department chan hnuaiah National Award dawng thei an awm chu ropui a tih thu a sawi a. Pi Laltanpuii Award dawn chu hmeichhe chawikanna kawngah hmasawnna pawimawh tak a ni tiin, hmeichhiate hmasawnna leh an ropuina phochhuahin a awm zel tih a lantir a ni, a ti bawk.
He hunah hian chawimawina dawngtu Pi Laltanpuii pawhin a bul tan chhoh dan te sawiin, Sericulture Department-in an tanpuina zawng zawngah lawmthu a sawi a. Mizo puan ziarang (design) te chu khawvel huap pawha mawi leh mithiamte pawhin ropui an tih anih thu a sawi bawk a ni.
Sericulture Department Director, Pu V Zothansanga chuan ‘Sericulture as a raw material of Handloom’ tih thupui hmangin thu a sawi a, Sericulture Scientist, Dr. Lalthlamuana Pachuau chuan National Merit Award Certificate chungchang sawifiahna hun a nei a ni.
Pi Laltanpuii hnena National Merit Award Certificate petu Development Commissioner for Handloom (DC Handloom) hi India rampumah puantah lama hmasawnna tura sulsutu ber niin, an hnuaiah hian Indian Institute of Handloom Technology 6 (paruk) leh Extension Centre 2 (pahnih) bakah Weaver Service Center 29 (sawmhnih leh pakua) an nei a. DC Handloom hian puantah lama mi chungchuangte chawimawina chi thum – Sant Kabir Award, National Award leh National Merit Certificate Award chawimawinate hi an pe thin a. Heng Award dawng tur hian selection committee pathum – Zonal, Headquarter leh Central Level committee-te paltlang a ngai a ni.
Vawiina chawimawina dawngtu Pi Laltanpuii hian Award a dawn theih nan hian puantah lai video leh thlalak te, weaving technique lama a thiam dan, inches khata 600 ends a zeh dan te telin document 26 zet a thehlut a. Pi Laltanpuii hian National Level Women Achiever Award, 2014 chu Ministry of Textiles atangin a lo dawng tawh a, kum 2019-a Mizoram State Enterpreneur Award dawng mi 3 zingah a tel bawk a. Indian Silk Magazine kum 2015 April-June issue-ah a chanchin hi tarlan a lo ni tawh bawk a ni.
Vawiin inkhawm hi Sericulture Department Secretary, Pu C. Lalrosanga chuan a kaihhruai a, Sericulture Joint Director Pu Lalrinawma chuan lawmthu sawina a nei a ni.
