Vawiin chawhma ah khan Aijal Club ah Handloom leh handicrafts a sumdawng te puala E-Commerce leh online marketing workshop, North Eastern Development Finance corporation, Ltd(NEDFi) in a buatsaih chu Commerce & Industries Minister Pu H.Rohluna chuan a hmanpui.

Commerce & Industries Minister Pu H.Rohluna chuan Mizoram chhungah puantaha eizawng tam tak an awm tawh thu tarlangin tualchhungah mamawh aia tam Mizo puantah lei tur a awm tawh tih a sawi a. Mizoram chhunga puantahtu ten state pawnlama thawnchhuah tur puantah leh thuamhnaw siam intihhmuh tan se a duh thu sawiin state pawnlammi te duhzawng cotton yarn erawh puantahna hmanrua ah hman a tul thu a tarlang. Handicrafts lamah duh angin sorkar in hma a la chak tawk thei lo chu pawi a tih thu sawiin hmalakna thar nen chak zawka handicrafts a Mizo kutthemthiamte chawikan sawrkarin a tum a ti a. NEDFi in Online Marketing hmanga Mizo handicrafts leh Handloom kutchhuakte hralh a nih theih nan kuthnathawktu leh sumdawngte kawng kawhmuhna hun a siamsak chu lawmawm a tih thu sawiin Mizo handicrafts/handloom producers te pawh an lo hlawk zawk nan an thilsiam te duhtui sawta uluk zawk turin a chah.

'E- Commerce Platform for marketing of Handloom and handicrafts products' tih thupui hmanga workshop buatsaih ah hian Pu A.K. Das, DGM,NEDFI bakah Indian Postal Department Official te leh mithiam ten Online Marketing hmanga bungraw hralh chungchanga thil pawimawh te leh hriattur tul te an sawi a. Technical Session pawh buatsaih a ni.