Vawiin chawhma khan Lunglei DC Pi Lalzarmawii, IAS kaihhruaiin a pisaah Lunglei District Level Core Committee on Bru Repatriation and Rehabilitation an thukhawm a, Bru hruaikir dan tur an sawiho.

Meeting-ah hian November ni 7, 2016 atanga Bru Camp pali (4)-a identification neih zawh takah Khakchangpara atangin chhungkaw 4, Hamsapara atangin chhungkaw 1, Naisingpara atangin chhungkaw 63 leh Hazachera atangin chhungkaw 316 te enfiah an nih thu tarlan a ni a. November ni 30 leh December ni 15 chhunga heng Camp-te atanga Bru hruaikir tura ruahmanna siam te thlir hona neih niin, Bru hruai kîrte chenna tur hmun siamsak te, an kal dan tur leh ei leh in pek dan tur te, venhimna pek dan tur te, damdawi sem tur leh damlo enkawlna te, tui in tur thianghlim leh kawlpetha pek dan turte sawiho a ni.