477/2026-2027

Dated Aizawl, the 12th May 2026: Vawiin khan Textiles industry in hma a sawn theih nan State Level Consultative Workshop chu Planning & Programme Implementation Department Conference Hall, Treasury Square-ah neih a ni a. Commerce, Industries, Geology & Mining Department changtu Minister Pu F. Rodingliana chuan khuallian niin a hmanpui.

Minister chuan he consultative workshop a telpui thei chu lawmawm a tih thu a sawi a. Industry than zel theihna atana power supply a pawimawhzia sawiin, chung mamawhna phuhru tur chuan power lamah pawh Mizoram intodelh theihna turin hma a lak zel thu te, industry chuan an hnathawh zar an zo ngei a beisei thu te a sawi bawk a. “Mizote chu handloom lamah kan sang a, GI tag hial kan neih tawhna Puanchei, Pawndum, Tawlhlohpuan, Ngotekherh leh Hmaram te chu kan Mizo culture keng nungtu an ni”, tiin Pu F. Rodingliana chuan a ti. Kan rama raw materials (leilung hausakna) kan neih ve te (a bikin mau leh changel) tangkai taka kan hman theih a rin thu Minister chuan a sawi a. Mizoramin hma a sawn zelna tur te, thalaite chawikanna atan leh hna tam zawk siam theihna turin industry chu a pawimawh a ni, a ti bawk.

He programme hi Ministry of Textiles atangin Joint Textile Commissioner Pu Sarveshwar Bhure chuan online-a telpuiin, India sawrkar chuan kum 2030-ah Textiles industry atanga export (thawn chhuah) zat chu USD 100 billion han hawlh thei turin a beisei a, Mizoram pawhin he target-ah hian nasa takin a contribute (thawh) ve thei a ni, a ti a. Mizoram chu handloom leh handicrafts lama an san thu leh tun aia hma an sawn zel theihna tur kawngah India sawrkar laipui chuan puih a inhuam reng thu a sawi bawk.

He hun hi Commerce, Industries, Geology & Mining Department Secretary Pu Dr. H. Lianzela chuan Chairman niin a kaihruai a. Textiles hmang hian kan hnam rohlu phochhuah a nih zel theih a beisei thu a sawi a. Workshop-ah hian a hnuaia topic hrang hrang tarlan hmang hian zirhona hun hman a ni:

1.    District and Cluster-led export Strategy

2.    Producer Diversification, Design and Value Addition

3.    Exporter Enablement and FTA Utilisation

4.    Credit, Logistics, Infrastructure, Skills Enablement

5.    Sustainability, ESG & Data Systems

He workshop-ah hian Textiles sector hnuaia Handloom, Handicrafts, Apparel leh Sericulture lama sawrkar mi pawimawh leh stakeholder eng emaw zat an tel a ni.