DIRECTORATE OF INFORMATION & PUBLIC RELATIONS, Government of Mizoram, India

477/2026-2027

Lunglei, 2026 Ṭomir thla ni 12: Vawiin khan Lunglei District Development Co-ordination and Monitoring Committee (DISHA) chu an Chairman, Member of Parliament (Lok Sabha) Pu Richard Vanlalhmangaiha hovin Lunglei DC Conference Hall-ah an ṭhu khawm.

Chairman Pu Richard Vanlalhmangaiha chuan DISHA chu sawrkar laipui ruahmanna hnuaia hmasawnna hna thawh hrang hrang thlir hona hun a nih angin a pawimawh hle tih sawiin, member-te pawhin ngai pawimawh tur leh DISHA ṭhut khawma rawtna lutte chu thawktute pawhin chak taka bawhzui zel turin a chah a. Line department-te inbuatsaihna leh hna thawh fakin, awmze nei zawk leh chak zawka hmasawnna hna thawh kalpui a nih theih nan department hrang hrangte chu theih tawp chhuah chhunzawm zel turin a chah.

Lunglei DISHA ṭhut khawmah hian Lunglei High Powered Committee (HPC) Vice Chairman & Lunglei North bialtu MLA, Pu V. Malsawmtluanga, Lunglei South bialtu MLA Pu Lalramliana Papuia, Deputy Commissioner & Member Secretary Pi Navneet Mann leh DRDO Project Director Pi Zoramdini te bakah, line department official-te leh pawl hrang hrang ai awhte an tel a. Sawrkar kum liam ta 3rd Quarter leh 4th Quarter (October 2025 – March 2026) inkar chhunga Lunglei District-a sawrkar laipui ruahmanna hnuaia hmasawnna hna hrang hrang kalpui dan thlir ho niin, harsatna awmte leh a chin fel dan tur leh hma lak zui zel dan tur te sawi ho a ni.

He DISHA ṭhut khawmah hian sawrkar laipui scheme hrang hrang – RD Department hnuaia MGNREGS, PMAY-G, PMAY-G Awaas Plus, PMKSY 2.0, MzSRLM, DDU-GKY leh Lakhpati Didi te; PWD hnuaia PMGSY te; PHE Department hnuaia AMRUT 2.0, JJM leh SBM(G) te; P&E Department hnuaia RDSS te; LR&S Department hnuaia DILRMP te; FCS&CA Department hnuaia PMUY leh NFSA te; H&FW Department hnuaia National Health Mission (NHM) programme hrang hrang te; Transport Department hnuaia VAHAN leh SARATHI te; LAD hnuaia RGSA leh 15th Finance Commission Grant te; Agriculture & FW Department hnuaia PMKSY, RKVY, SHC, PM-KISAN leh scheme dang te; AH & Vety Department hnuaia RGM, NADCP leh NLM te; School Education Department hnuaia Samagra Shiksha, PM-POSHAN (Mid-Day Meal) leh PM SHRI School te; Social Welfare Department hnuaia NSAP te; Women & Child Development Department hnuaia ICDS, BBBP, PMMVY, Saksham & Poshan 2.0, OSC leh CP&SC te; Irrigation & Water Resources Department hnuaia PMKSY te; UD&PA Department hnuaia SBM(U), PMAY(U) leh PM-SVANidhi te; Lead Bank Office hnuaia SSA, PMJDY, PMJJBY, PMSBY, APY leh scheme hrang hrang te; Commerce & Industries leh KVI hnuaia PMEGP te; Fisheries Department hnuaia PMMSY te; Legal Metrology hnuaia BIS te; RSETI hnuaia Skill Development Training hma lakna te sawi ho a ni.

Lunglei DISHA ṭhut khawma tar lan a nih danin, MGNREGS hnuaiah Lunglei District-a khaw 106-ah job card nung lai 20,077 awm mekin, kum 2025–2026 chhungin ni 100 inhlawhna siam a ni a. Hna thawh tur ruahman 2,772 aṭangin hna 2,558 thawh zawh tawh niin, thawh mek 214 a la awm. Lakhpati Didi hnuaia SHG member-te'n kum khata cheng nuai khat aia tam la lut tura hma laknaah Lunglei District-ah kum 2024–2027 atan target 2,299 awmin, kum 2025–2026 chhungin 605 (26.31%) tihhlawhtlin tawh a ni.

AMRUT 2.0 hnuaia cheng nuai 997.78 senga Greater Lunglei Water Supply Scheme tihchangtlun hna thawh mek chu 87% zawh tawh niin, cheng nuai 795.21 senga Tlabunga WSS (Solar Pumping) tihchangtlun hna thawh mek pawh 70% zawh tawh a ni a. SBM(G) hnuaiah Lunglei District chhungah ek in (IHHL) 1,229 sak zawh a ni.

PMGSY hnuaia Lunglei–Kawlhawk–Buarpui Road KM 66.500-a thui siam ṭhat mek chu 16.38% zawh tawh niin, Phairuang–Thenhlum (Upto Bolia) Road KM 48.770-a thui leh Phairuang–Thenhlum (Bolia to Thenhlum) Road KM 16.23-a thui siam ṭhat mek pawh 46% ve ve zawh tawh a ni.

Tun dinhmunah DCSO Lunglei hnuaiah ration card 40,369 awmin, ration card-a hming chuang mi 1,46,990 an awm mek a. PMUY hnuaia a thlawna gas connection pek chhungkaw 919 an awm.

Samagra Shiksha hnuaiah kum 2025–2026-ah Lunglei District chhunga zirlai 9,680 hnenah a thlawnin sikul thuam (uniform) sem a ni a, zirlai 9,735 hnenah a thlawnin zirlaibu sem a ni bawk a. PM-POSHAN hnuaiah sikul 441-a zirlai 20,720 hnenah a thlawnin chawchhun pek a ni bawk.

NSAP hnuaiah kum 2025–2026 chhungin Lunglei District chhungah tar chawmna (old age pension) la mi 3,643; hmeithai (widow) pension la mi 310 leh vohbik (disability) pension la mi 99 an awm a. Lunglei District chhunga Anganwadi Centre 304 kal tlangin Supplementary Nutrition Programme (SNP) hnuaia chaw ṭha dawng naupang, hmeichhe tleirawl, nu nau pai leh nau pawm mi 10,753 an awm.

Attachment