477/2026-2027 

Serchhip, the 12th May, 2024: Vawiin khan District Programme Officer (DPO), Women & Child Development (WCD) Department, Serchhip District chuan Mother’s Day denchhenin Serchhip khuaa nu chhuanawm (exceptional mother) chawimawina hun DC Office Chamber-ah an hmang a, Pi A. Lalawmpuii hnenah he chawimawina hi hlan niin Serchhip Deputy Commissioner  Pu Paul L. Khuma’n a hlan a ni.

Pu Paul L. Khuma chuan Pi Lalawmpuii chu nu chhuanawm tak a nih thu sawiin he chawimawina hi a phu hle tih a sawi a. ‘A fapa vohbik hlawhtling taka lehkha zir tira, sawrkar hna tha tak hmu thei khawpa a enkawl seilen mai bakah, Shalom Special School-a naupang dangte a hun puma enkawl zui zel tura a inpekna chuan chawimawi a phu hle a ni’, a ti.

Vawiina Exceptional Mother chawimawina hun hi Serchhip District Programme Officer Pi Lalthlamuani Rokhum-in a kaihhruai a, District Mission Coordinator Pu R. Lalvensanga hnen atangin chawimawina dawng tura thlan chhuah a nih dan ngaihthlak a ni. Pi A. Lalawmpuii hnenah hian chawimawina thuziak (Memento) leh lawmman pawisa fai ₹5,000/- hlan a ni.

Pi A. Lalawmpuii hi Serchhip Venglaia cheng niin fa pali a nei a, a fapa upa ber Vanlalnghaka Chhangte hi a naupan tet atanga rualbanlo (Vohbik) - Cerebral Palsy (Spastic Quadriplegia) niin, chuti chung chuan zirna lamah hlawhtling taka chher chhuakin, tunah hian PWD Department ah Junior Engineer (J.E) ni thei hial khawpin a chher chhuak a ni. Tin, Vohbik school -Shalom Special School, Serchhip chu kum 2005 ah khan a dintute zingah telin tunah hian Head in charge in a awm mek a ni.