478/2026-2027

Lawngtlai, 12th May 2026: Vawiin khan Rural Development & Administration Department Minister Prof. Lalnilawma chuan khuallian niin 'Community Managed Training Centre (CMTC)' leh 'Gender Resource Centre (GRC)' Sangau a hawng a. Dr. Lorrain Lalpekliana Chinzah Adviser to Chief Minister leh Lawngtlai East bialtu MLA nibawk chuan khualzahawm niin a hmanpui.

Prof. Lalnilawma chuan a mamawhtuten tangkai taka an hman leh malsawmna thlentu ni tura  lawm taka 'Community Managed Training Centre' leh Gender Resource Centre - a hawn thu a sawi a. CMTC leh GRC - chu Sangau RD Block - tana hmasawnna thlentu pawimawh tak a nih a beisei thu sawiin, a taka chhawr tangkai thiam a tul dawn hle a ti a. Sawrkarin khawtlang tan thil tha tak tak a siam thin a, chutih rualin a  enkawlzui lamah hmasawnna a awm lo thin hle tiin,  a enkawl lamah thahnemngaih  a tul hle tiin, a bik takin Far Pak Cluster Level Federation- te chu duat leh hmangaih taka enkawl turin a chah a ni. 

Khuallian chuan CMTC  Buliding hnuai bera computer zirna tur room  siam chu thil tha tak a nih thu sawiin, theihtawp chhuah a tum thu a sawi a. Sangau khawtlangin harsatna an tawh lian tak pakhat  tui lama harsatna an neih pawh bawhzui a tum thu a sawi a ni. Nu hoin  khawtlangah tangkaina lian tak an nei a, ram leh hnam hmasawnna turin theihtawp an chhuah fo thin tih tarlangin, khawtlang leh ram tana theihtawp chhuah zel turin a fuih a. Self Help Group - ten an thil tharchhuahte man man zawka hralh a nih theih nan sawrkarin theihtawp a chhuah reng thu sawiin, SHG- te thahnemngai taka thawk zel turin a chah a. Ei leh bar kawnga intodelh a pawimawh thu sawiin, Prof. Lalnilawma chuan Sangau RD Block hnuaia SHG - te ngaituahna thar nena  theihtawp chhuaha  thawk zel turin a fuih nghal bawk a ni. 

Khualzahawm Dr. Lorrain Lalpekliana Chinzah chuan sawrkar hmalakna pawimawh tak a nih angin, khawtlang mipuite pawhin hlut thiam a tul hle a ti a. A enkawltu tur  Far Pak Cluster Level Federation- te pawhin thahnemngai taka enkawl a tul dawn tiin, duat taka enkawl turin a fuih a. CMTC leh GRC- chuan khawtlangah hmasawnna a thlen ngei a beisei tlat tih tarlangin, a hmangtangkaitu tur zawng zawngte duhsakna a hlan nghal bawk a ni. 

Pu V. Lalengmawia, Addl.Secretary, RD& AD pawhin thu tawi sawiin, Nu hoten tangkai taka an hman tur a nih angin khawtlang pawhin an chhawr dawn hle a ti a. A enkawl kawngah neitu thinlung pu a, theihtawp chhuah zel turin a chah nghal a. Pi F. Remsangliani, President, Pak Cluster Level Federation  pawhin thutawi a sawi bawk a ni. 

Pi Zosangzuali Pachuau, CEO, MzSLRM chuan report pekna a nei a. Community Managed Training Centre' leh 'Gender Resource Centre' Sangau chu ni 15 January 2025 - ah sak tan niin August 2025 ah sak zawh a ni, a ti a. A sak nan hian cheng  nuai 35 sen niin,  a chhung cheina atan cheng  nuai riat singa sen a nih thu a sawi a. He Centre - hi Far Pak Cluster Level Federation (SHG)  - te enkawl tur a nih thu a tarlang bawk.

Vawiin hun hmannaah hian CLF Member - te leh khawtlang hruaitute an telkim tha hle a, Pu H. Zonunmaiwa, PD, DRDO, Lawngtlai District chuan hun  kaihhruaiin, kalkhawmte lawmna thu a sawi a. Pu Thomas Maratha Hlychho, BDO,Sangau chuan lawmthu sawiin hun a khar.

RD & AD Minister hian BDO Office, Sangau  tlawh nghalin BDO leh Staff - ten an lo dawngsawng a. Minister hi Pu V. Lalengmawia, Additional Secretary, RD&AD, Pi Zosangzuali Pachuau, CEO MzSLRM, ten Aizawl atangin an lo  tawiawm a ni.