1732/2024-2025

Aizawl, 26.08.2024: Vawiin chawhma khan Commerce & Industries Minister Pu F. Rodingliana chuan McCabe Hall, Aijal Club ah UNNATI 2024 – India hmarchhak state-te ah industry hmanga economy hmasawnna chak zawk a thlen theih nana hmalakna chu Mizoram tan a tlangzarh. Unnati 2024 chungchangah inzirtirna leh inhrilhhriatna neih nghal a ni.

Minister Pu F. Rodingliana chuan industry hmasawnna tur sorkar laipui scheme tha tak mai tlangzarh a ni chu lawmawm a tiin, a kaihhnawih service hrang hrangte tan hmasawnna tha tak a thlen a beisei thu a sawi a. State sorkar in Handholding Policy a kalpui mek leh tunhnai lawka Strategic Investment Plan hnuaia MSME Elevate Mizoram (MEMiz) Scheme a siam leh hmalakna dangte nen a remchan dan ang zela inzarzawm in, industry neitute tan hmasawnna tha tak a thlen a beisei thu a sawi. Minister chuan eizawnna atan sorkar a innghat ngawt lo thangthar thiam leh taima tak tak Mizoramin a nei tawh chu lawmawm a ti a. Tun hma lamah Mizorama industry neitute zingah an eizawnna bultan leh tihhmasawnna tur loan an puk te chu a nihna tur a hmang lo te, rul thalo te an lo awm thin thu leh chu chuan industry thanna tur a tihthuanawp thu a sawi a. Tun hnuah chuan hmasawn a hlawhtling tak tak duhte tan sorkar chuan theihtawp a chhuah tur thu sawiin Handholding Policy hmanga industry tihhmasawn a nih dan tur te a sawifiah a. Minister Pu F. Rodingliana chuan ram danga mi hausa leh ropui tak takte chu industry neitute an nih thin thu sawiin, vawiin thalai kalkhawmte chu chung dinhmun an thlen ve a duhsak thu sawiin chin thalo lo awm thin chu ti ve lo turin a chah bawk a. Sorkar hna chu ‘public service’ a nih angin handholding policy leh policy dang dangte chu tangkai thei ang bera chhawr a nih nan official te pawh inhawng takin kalpui turin a chah bawk.

Vawiin UNNATI scheme tlangzarhna hi Pi Maria C.T. Zuali, Commerce & Industries Director chuan kaihruaiin, Dr. Lalzirmawia Chhangte, Commerce & Industries Secretary chuan kalkhawmte lawmna thu a sawi a. Dr. Karampaul Singh, Nodal Officer for NER States Meghalaya and Tripura for UNNATI scheme chuan scheme thar chungchang sawifiahna a nei a. Addl. Director, Commerce & Industries Pu Lalhmunsiama chuan lawmthu sawiina tlangzarhna inkhawm hi a khar a. Sensitization Programme neih chhunzawm a ni.

UNNATI Sensitization programme ah hian Health Care (Hospitals/ Diagnostic Centres, etc.), Food & Beverages (Horticulture, Agriculture, Food Entrepreneurs, etc.), Tourism Sector (Hotels/ Home Stays) leh Education (LESDE/ Vocational & Digital/IT & ITES) ah te inhrilhhriatna neih a ni.