233/2023-2024

Champhai, the 27th April, 2023: Commerce & Industries (C&I) Minister Dr. R. Lalthangliana chuan tukin khan Champhai District chhung Indo-Myanmar ramri depa awm insumdawntawnna kawnga pawimawh tak Zokhawthar khua a tlawh. C&I Minister chuan ramri kaltlanga insumdawntawnna chak zawka kalpui a nih theihna tura hmalakna kalpui mekte a enfiah a, hmachhawp awmte bawhzui dan tur a enfiah nghal bawk. Dr. R. Lalthangliana hi Law & Judicial Minister Pu T.J. Lalnuntluanga, Champhai South bialtu MLA chuan a tawiawm a ni.

Dr. R.Lalthangliana chuan Covid-19 hrileng avanga hun engemawchen hmasawnna hna thawh a khaihlak thu sawiin, hna thawh theih hun chhungahte theihtawp chhuaha hmalak a nih thu a sawi a. Ramri insumdawntawnna kawngah mipui eizawnna tibuai lo leh khaihlak lo tura hmalak chu Sawrkar duhdan a nih thu sawiin, danin a phalte hmanga sumdawnna kalpui chu mipuite zawm tur leh mawhphurhna a nih thu a sawi bawk a. International Border Trade tihchangtlun nan cheng nuai 1,500 in Zokhawthar Land Custom Station upgradation kalpui mek a nih thu a sawi a. Heng bakah hian India rama International Border Trade lian tham zawk kalpuina tur hmun 25 tunhnai maia thlan chhuah zingah Zokhawthar leh Zorinpui te thlan tel an ni chu lawmawm a tih thu sawiin, hengahte hian border trade tihhmasawnna tur project lian tham zawk kalpui tum a ni, a ti bawk.

Health Minister ni bawk chuan hriselna kawnga hmalak zingah Zokhawthar Health Sub-Centre pawh B.Sc Nursing thutchilh, Health & Wellness Centre-ah hlankai a nih thu leh hmunhmate pawh sak that mek a nih thu a sawi a. Thawktu leh hmanraw pawimawh hrang hrangte nen thuamthat zel tum a ni, a ti a. Zokhawthar khuaa zirna tha leh changtlung zawk mamawhna thlente chu a tul anga lo enzui a tum thu a sawi bawk.

Law & Judicial Minister Pu T.J. Lalnuntluanga chuan Zokhawthar kaltlanga sumdawnna tun aia tihchangtlun dan tur ngaihtuaha hmalak mek zel a nih thu a sawi a. Ramri dep khaw pawimawh tak a nih avangin sumdawnna mai bakah inkalpawhna, transportation, infiamna, zirna leh hriselna lama hmasawnna ruhrelte pawh tih hmasawn tel ve zel a tul a ni, a ti a. Land Custom Station cheng nuai 1,500 senga cheithat mek chu lawmawm tiin, Chief Minister leh Commerce & Industries Minister-te thahnemngaihpuinaah bial aiawhin lawmthu a sawi a. Land Custom Station (LCS) aia changtlung Integrated Check Post (ICP) nei thei tura hmalak kawngah chak lehzuala tanlak zel a pawimawh thu a sawi a. Zokhawthar panna kawng chhia siam that nan Special Assistance to State for Capital Investment (SASCI) sum cheng nuai 1,350 dah a nih thu a sawi bawk a. Myanmar nena insumdawntawnna hmun pawimawh tak, Zokhawthar Tiau luia Mizoram leh Myanmar inkalpawhna Lei siamna tur, cheng vaibelchhe 22.50 hu project proposal Mizoram PWD siam tawh chu Sawrkar laipui Ministry of Road Transport & Highways Minister Pu Nitin Gadkari hnena thlen a nih thu leh document pawimawhte pawh pek a nih thu sawiin, beiseina sang tak kan nei a ni, a ti bawk.

He hunah hian Pu Ronald Lalchhuanawma, Deputy Director, Commerce & Industries (Commerce) Department & Nodal Officer, Border Trade hnen atangin Land Custom Station (LCS) atanga Integrated Check Post (ICP) a hlankai a nih theihna tura Land Port Authority of India dawra hmalak dan chungchangte ngaihthlak a ni a. Thenawm ram buai avanga dan anga chak taka hmalak a harsat rih thu leh hna a khaihlak phah thu a sawi a. Special Assistance to State for Capital Investment (SASCI) sum cheng nuai 1,500 hmanga Zokhawthara insumdawntawnna tihchangtlun nana hmalak mek dante a sawifiah bawk.

Commerce & Industries Minister Dr. R. Lalthangliana chuan SASCI sum cheng nuai 1,500 senga Land Custom Station upgradation kalpui mek hnuaia sak Staffs Qtrs, Officers Qtrs, Animal Quarantine Centre, Plant Quarantine Centre, Food Testing Laboratory, Immigration Check Post-te tlawhin hmalakna a enfiah a. Contractor-te chu hna tlo leh tha zawk, ram tana rotling hun bi tuk chhung ngeia zo hman turin a chah a ni.

Commerce & Industries Minister Dr. R.Lalthangliana hi Champhai DC Pu James Lalrinchhana, SP Pu Lalrinpuia Varte, H&FW Department atangin Principal Director Pu PC Lalramliana, Pu Lalfakzuala, Sr. Executive Engineer, Commerce & Industries (Commerce) Department atangin Pi Lalsangpuii, Addl. Director, Pu Vanlalpara, DMO te bakah Pu V.Lalhmangaiha, DCIO leh Official dangte'n an tawiawm a ni.