234/2023-2024

Kolasib dated 27th April 2023: Vawiin chawhma khan Chief Medical Office, Kolasibah Pu John LT Sanga, Deputy Commissioner hovin Covid-19 hrileng lak a mipui kan him theih nana inpuahchahna duansa te thlir ho a ni a. Dr. Lalawmpuia Chhangte, CMO chuan District Hospital, Primary Health Centre leh Community Health Centre-a ruahmanna awm te sawi zauna hun hmangin Dr. Samuel Lalfakawma Fanai, District Medical Superintendent chuan khum 100 awm theihna District Hospital thar sak mek a hmalakna hrang hrangte a tarlang bawk a ni.

Pu John LT Sanga, Deputy Commissioner chuan India ram state hrang hrangte dinhmun thlirin Covid-19 hri kai an pun mek thu a sawi a, hemi anih avang hian mipui hriselna enkawl kawnga hma latuten hri lak a kan him theih nan ruahmanna tha tak an lo duang lawk chu lawmawm a tih thu a sawi. Covid-19 mai ni lo, natna dang inkaichhawn theih lak a kan him theih nan dam lo enkawlna hmun District Hospital, PHC, CHC leh puipunna hmun ah te chuan hmai tuamna vuah, kut silfai leh Hand sanitizer hman uar zel a pawimawh thu a sawi bawk a ni.

Dr. Lalawmpui Chhangte, Chief Medical Officer chuan tunhnai khan Kolasib district-ah Covid-19 hri kai mi 2 hmuhchhuahte pawh dam takin enkawlna hmun an chhuahsan leh tawh thu a sawi a, Covid-19 hri kai inringhlel te chu engtiklai pawhin District Hospital, CHC, PHC leh Health Sub-Centre-ah te RAT hmangin a inendik theih reng thu a sawi. Kolasib district chhunga Health & Family Welfare hnuai a thawktute chu Covid-19 hri a lo darh palh pawh a chetlak dan tur ‘Mock Drill’ neih pui thin an nih thu CMO chuan tarlangin Test Kit, PPE, Mask, damdawi hrang hrang leh thawktute dinhmun an thlithlai pui reng thu a sawi bawk a ni.

Vawiin thutkhawmnaah hian District Family Planning Indemnity Committee chungchang sawi hona neih nghal a ni a, TrueNat khawl dinhmunte endik niin khum 100 awm theihna District Hospital thar sak mek en pui a ni bawk. Deputy Commissioner chuan Eye Building, District Hospital, Kolasib in chung tui far nasa thawmthat dan tur enpuiin Oxygen Cylinder phurtu lirthei ruahman dan turte thawktute nen an sawi ho bawk a ni.

Khum 100 awm theihna Hospital hi NESIDS hnuai a Cheng nuai 1859.87 hmang a sak mek a ni a, hnathawh hun chhung tur hi thla 24 a ni. Motor hunna tur Basement, Ground Floor bakah chhawng thum a awm dawn a, mi 13 chuan theihna Lift dah a ni dawn bawk a ni. Hospital sak hna hi M/S VRC Constructions (I) Pvt Ltd, New Delhi-ten an thawk a ni.