235/2023-2024

Aizawl, the 27th April 2023: Governor Dr Hari Babu Kambhampati chuan vawiin khan Hackathon – police hnathawh tanpuina ngaituah chhuak tura computer thiam rual intihsiakna chu Arya Mess, PHQ-ah a hawng a. Hackathon(Hackadventute) hi Mizoram Police leh National Institute of Technology, Mizoram(NIT) tangkawpa buatsaih a ni a. He hunah hian India ram hmun hrang hranga NIT zirlai te, MZU, Govt Zirtiri Residential College, NIELIT leh ICFAI University a computer zirlaite chuan Police ten dan leh thupek an kenkawh kawnga harsatna an hmachhawn hrang hrang te an zirchiang anga, hemi behchhan hian Smart Policing atana Technology tha ngaihtuah chhuah an tum dawn a ni.

Hackathon hawngtu, Governor Dr Hari Babu Kambhampati chuan Mizoram Police ten hlawhtlinna lian tak tak an sual chhuak a, dan leh thuphek kenkawh kawngah te, ruihlo do kawngah te, hnu chhui kawngah te, pawikhawihna chhuihchhuah kawngah te, Aizawl leh khawpui danga lirthei veivak mumal taka kaihhruai kawngah leh thil dangah te hna ropui tak an thawk a ni a ti. Vawinah, NIT leh Mizoram Police ten computer thiam rual, zirlai hmabak eng tak nei te tana ram venhimna kawnga thluak thawh tura chona an chhawp chhuak chu ngaihtuahna fing taka atanga hmalakna a ni a, he intihsiakna hian rah tha tak a chhuah a rin thu a sawi a. Computer thiam bik, zirlai rual te chu ram tana an theihna sang ber chhuah tura fuihin duhsakna a hlan nghal a ni.

Governor chuan tunlai thiamna sang chho mekah Police te pawhin thiamna thar hmang tangkai tura an inzir thar reng a ngai tih a sawi a. India rama tech zirna tha zual zinga mi, NIT thawhpui nachang an hria chu lawmawm a tih thu sawiin Smart Policing atana thil tangkai tak takt e he thawhhona atang hian a lo chhuah ngei a beisei awm tih a sawi.

Full speech of Governor Dr Hari Babu Kambhampati : https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-hackathon-hackventure-at-arya-mess-police-headquarters-aizawl-on-27th-april-2023

He huna Mizoram Police aiawha thusawitu, DGP Pu Devesh Chandra Srivastava chuan Prime Minister in ram venhimna atan Poilce te technology thar ber bera thuam chak tura hma a lo lak tawh angin India ramah Smart Policing hi chak taka kalpui mek a ni a ti a. Tunhnai chhoah Cyber Crime a pung nasa hle a – sum chungchanga inbumna, mipat hmeichhiatna rawngkaia pawikhawihna, child pornography leh Dark Web kaltlanga danbawhchhiatna a hluar chho mek a. Mizoramah pawh Cyber crime kaihnawiah pawikhawihna a pung chho nasa tih a sawi. DGP chuan tun thlenga CyberCrime kaihhnawiah case an ziahluh zah chu 1033 a ni tawh tih a sawi a, danbawhchhetu mi 54 man an ni tawh a, tun hnaiah mi 16 chu thiamloh chantir an ni tawh a ni a ti. DGP chuan nitina Police ten dan leh thupek an kenkawh kawngah te, hnuchhui kawngah leh pawikhawihna liantham chhuichhuahna kawngah te bakah khawpuia Traffice Management atana technology thar te an sawtpui na tur te a sawi bawk.

NIT, Mizoram aiawha thusawitu, Dr.Lalthanchami Sailo, Registrar, NIT chuan Mizoram Police nen an thawhho dan, Hackathon a lo chhuah dan te leh nakin zela Police te tha ti chak tura NIT ten hmalak pui an inhuam thu te a sawi a. NIT chu India rama Tech Institute zinga a tha ber bawl a ni a, Mizoramah NIT kan nei chu kan vannei tih sawiin NIT pawhin Mizoram mipui tana thil tangkai turah te ngaihtuahna seng chhunzawmin theihtawp a chhuah zel dawn a ni a ti.

Hackathon hi April 27 atanga 29, 2023 chhunga neih tur a ni a. He hunah hian zirlai te chuan dan leh thupek kengkawhtuten an nitin hnathawhah eng harsatna nge an hmachhawn thin tih te leh cyber crime chungchang te an zir anga. Heng an thil hmuhte behchhan hian Dan leh Thupek kengkawhtute mamawh leh hman tangkai tur technology duan chhuah an tum dawn a ni. He intihsiakna neih chhung hian Narcotics Control Bureau (NCB), Indian Cybercrime Coordination Centre (14C), National Crime Records Bureau (NCRB) leh Cyber Security lama mithiamte te hnen atangin an hriattur te kawhhmuh an ni dawn bawk a ni.

Pu Lalbiakthanga Khiangte, IGP, Law & Order, Pu Lalhuliana fanai, DIG, CID, Senior Police Officer rual, zirtirtute leh sawmbik te he hun hi an chhim a. Hawnna program tannaah  Dr.Sandeep Kumar Dash, HoD, CSE, NIT chuan thuhmahruai a sawi a. DGP leh Registrar, NIT ten thu an sawi zawhah  Dr.Lalhruaizela, Asst Prof, CSE, NIT chuan lawmthu sawiiin he hun hi a khar a ni.