236/2023-2024

Dated Serchhip, the 27th April, 2023: Vawiin chhun dar 11:00 khan Serchhip DC Conference Hall ah Tribal Artisan Mela (TAM) chu Serchhip District pualin buatsaih a ni. Pi Nazuk Kumar, DC Serchhip chuan a tel pui.

Serchhip Tribal Artisan Mela ah hian UD&PA, Co-operation Department leh MzSRLM hmalakna hnuaia Self Help Group, Cooperative Society leh mimal thilsiam lam thiam mi 60 velin an thilsiam an pho chhuak a. An thil phochhuah te hi TRIFED lama mithiamten endikin lian tham leh zau zawka zawrh theih dan te, hlawk zawka hralh theih dan turte an en a ni. Sample pho chhuahte hi an hmunpui lama thawn turin an lei sak bakah TRIFED hian registration an neih pui bawk a, tuna in register/empanel tawhte tan hian India ram khawpui a TRIFED Mela an la neih leh zel turah pawh kalna hun remchang siam sak theih an beisei bawk. TRIFED atanga hian Mamata Sharma, Deputy General Manager (Marketing), TRIFED Head Office, New Delhi leh Raj Vashisth, Regional Manager, Mizoram State viltu Regional Office, West Bengal te, bakah NE Handicraft & Handloom Development Corporation aiawh mi pahnih an lo kal a ni.

Tribal Artisan Mela (TAM) in a tum ber chu hmun kilkhawr zawka miten an thilsiamte phochhuahna remchang an neihna tur leh an thiamna hmanga intodelh tir tura tanpui a ni.

Tribal Artisan Mela hi naktuk ni 28.4.2023 1:00 AM hian Thenzawl Public Playground ah chhunzawm tur a ni a, mipuite tel theuh turin an sawm nghal a ni.