Nimin khan Commerce & Industries Department changtu Minister Pu H.Rohluna leh Parliamentary Secretary Pu Joseph Lalhimpuia ten Meghalaya border-a India leh Bangladesh insumdawntawnna hmun Dawki an tlawh.

Mizorama International border kan neih te hmang tangkai lehzual a ram dang nena insumdawn tawnna kawnga hmalakna atana tangkai tur te zir chiang pahin, Dawki hmuna ICP (International Check Post) din tura ruahmanna lo awm tawh te chu en thlithlaiin Tlabung leh Kawrpuichhuah a ICP din ve tur atana thil tangkai tur te an en bawk a ni. Minister te hi Pu Lalhmingmawia IRS, Dy. Commissioner, Central Excise, Shillong Division-a awm mek chuan lo kaihruaiin Dawki hmuna border trade kalpui mek dan leh thil tangkai leh pawimawh dang te a lo hrilhfiah a, chhunchaw tuihnai tak a lo buatsaih sak bawk a ni.

Minister te hi Shillong-a Investors' Summit hmanga kal an ni a. Pu Zothankhuma ITS, Commerce & Industries Secretary, Pu J. Hmingthanmawia IAS, Director, Commerce & Industries Department te bakah Pu Jacob Lalawmpuia MCS, DRC, Shillong leh Pu R.C. Lalzarmawia, Shillong Group YMA Vice President ten an tawiawm bawk.