Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan nimin February ni 1, 2017 (Nilaini) khan Guwahati Raj Bhawan-ah North East Frontier Railways General Manager Pu HK Jaggi nen inkawmin Mizorama-a rail kawng siam mek chungchangah an hmalak dan an sawidun.

Mizoram Governor chuan hun rei tak atanga Mizo mipuite nghakhlelh railway hmanga Sairang thleng inkalpawhna chu a tak ram a chan thuai dawn avang leh NE railways-te hnathawh chungah lawmthu a sawi a. Mizoram leilung leh ramngaw mila railway kawng thar tur hi duan a finthlak a rin thu hrilhin Pu Nirbhay Sharma chuan railway station an sak rualin a panna kawng (approach roads) pawh siam nghal ni thei se, hemi hna hi a rang lama thawk turin Railways hotute chu a chah a. Sairang-a railway station lian ber (main railhead/station) ah zinmite mamawh tur hrang hrang bakah medical centre, school leh rail chawlh khawmna tur (marshalling yard) pawh changtlung tak siam nise a duh thu a hrilh bawk a. He rail kawng hna thawk mek contract-ah hun tiam chhunga hnathawk zo thei lote hremna (penalty) pawh tel ngei nise tiin General Manager a hrilh a ni.

Mizoram Larsap hna pawimawha state pawna zin chuan a rawn haw lamah nimin khan Guwahati a tlawh a, nimin tlai vek khan Aizawl lo lutin tlai dar 4:20PM ah a chenna Raj Bhawan a rawn thleng a ni.

Attachment

  • Loading attachment...