Vawiin chawhnu dar 1 khan Commerce & Industries Minister Pu H.Rohluna leh Australia Consul General Pu B.Vanlalvawna IFS te chuan Minister  Office chamber-ah Mizo dehchhuah zau zawka hralh chhuah dan tur an sawi dun.

Australia Consul General nena an inkawmnaah hian Pu H.Rohluna chuan Handloom lama Mizo puantah hmeichhe puanbih ang chi ringawt hi chu Mizoram chhungah pawh a hralhchhuahna a hnawng tep tawh a, hnamdangten an duh tur leh thawnchhuah theih tur ang zawnga kal a hun tawh tih a sawi a, Mizo dehchhuah ramdanga hralhchhuahna kawnga tan lak chu a hun hle tawha a hriat thu a hrilh. New Delhi-a Trade fare neih thinah pawh Mizoram stall chu a lun thei hle a, Mizote hi kan mit a fing a, kan dehchhuah rawng hrang hranga cheimawi dan hnamdang pawhin an duh hle, tanho dan awm thei se, handloom products chi hrang hrang zau zawka hralh chhuak tura thawhdun dan awm thei se a duh thu te a hrilh a. Sydney-a Consul General Pu B.Vanlalvawna chuan sumdawnna leh peipunna lamah Mizoram tan kawng a awm thu Minister hi a hrilh a. Puantahna hmanrua lamah te pawh inpuih theih dan kawng a awm a, Australia hian handloom lamah an mamawh ang tawk an hmu thei lova, Mizo dehchhuah Australia-a hralh tura hmalak dan kawng a awm thu leh thiltih dan tur te Minister hi a sawipui a. Commerce & Industry-in dehchhuah a neih theih chuan a hralhna tur lam chu Sydney-ah a tul dan ang anga an lo buaipui theih tur thu Minister hi a hrilh bawk.

Minister nena an inkawmnaah hian Handloom lama dehchhuah nei thate thlang chhuakin Australia lama heti lama sumdawngte nen video conferencing-a inkawm zui nise, thla hnih khat hnuah bawhzui nghal nise an ti bawk.

Australia Consul General nena an inkawmnaah hian  Minister  hi Commerce & Industries Commissioner Pu Zothankhuma leh Director Pu Hmingthanmawia ten an tawiawm a ni.