Vawiin khan Commissioner/Secretary Pu Arun Goel IAS hovin School Education Department leh SCERT Department-a Officer-ten Aizawla Secretariat Conference Hall-ah Department pahnih  hnathawh chi hrang hrang thlir hovin meeting an nei.

Meeting-ah hian School Education Department, Mid-day meal, RMSA, SSA leh SCERT Department hnathawh chi hrang hrang thlirho a ni a. Primary School atanga Higher Secondary School thlengin sorkar school-ah zirlai 1,76,453 an awm a, private school ah zirlai 1,36,184 an awm tih tarlan a ni a, Mid-day meal-ah 2014-15 chhungin sorkar laipui atangin cheng nuai 2,049.78 hmuh tawh a ni a, Mizoram sorkar atangin cheng nuai 683.21 hmuh tawh a ni tih te tarlan a ni bawk. 2015-16 chhung atan Project Approval Board chuan Primary-ah naupang 98,825 a rawn pawmpui tawh a, Middle school zirlai 46,550 a rawn pawm tawh bawk. Mid-day meal-ah hian naupang awm zat primary leh middle atangin sum hi rawn pek thin a ni.

SCERT Department hnathawh chi hrang hrang tarlan zingah kum 2016-17 atangin NCERT text book chu class V-VIII zirlaite tan hman tura ruahman mek anih thu te, sorkar laipui atanga sum hmuh tlai avangin teacher education-ah harsatna an neih thu te, sum harsatna avanga post ruak hnawhkhah theih loh te tarlan a ni bawk.

RMSA zirtirtu training la neilo 180 bawr vel chu IASE/CTE Multi mode programme-ah training tir mek an ni tih te, RMSA hian tun sorkar kum kal mekah sorkar laipui atangin sum cheng nuai 1705.10 leh Mizoram sorkar atangin cheng nuai 64.10 a dawn tawh thu te tarlan a ni a. SSA-in sorkar laipui atangin tun sorkar kum kal lai mekah hian cheng nuai 13,180.897 leh Mizoram sorkar atangin cheng nuai 1,218.25 a dawn tawh thu te pawh tarlan a ni bawk. Naupang an kumbi mil zela sikul kal an pun thu te leh zirna tawpsan an tlem tial tial thu te tarlan a ni bawk.