Vawiin khan I & PR Conference Hall-ah Food, Civil Supplies & Consumer Affairs Minister Pu John Rotluangliana hovin Direct Benefit Transfer of LPG (DBTL) Scheme kalpui mek dan thlirho a ni a, harsatna awm te sawiho niin hmalak zel dan tur rel a ni a. He meeting ah hian Parliamentary Secretary Pu T.T. Zothansanga; Food Civil Supplies & Consumer Affairs Department, Director Pu H. L. Rochungnunga leh FCS & CA Department officer te; DCSO te; IOC aiawh te; Mizoram pumah Gas Agency hrang hrang neitute; SBI, MRB leh MCAB leh bank dang aiawhte leh Mizoram Consumer Union hruaitute an tel a ni.
Supply Minister chuan DBTL Scheme hnuaia gas consumer-te inziahluhna hun grace period chu March ni 31 ah a tawp dawn avangin kan inpuahchahna leh hmalaknate thlirho a, harsatna awm te sawiho a, mipuiten harsatna an tawh loh nan hma lak zel dan tur rel tura meeting hi koh anih thu a sawi a, mipuiten he thil hi ngai pawimawh a, March thla ral hma ngeia inziak lut lo te chu inziaklut vek turin a ngen a. DCSO hrang hrangte weekly report a a lan danin, DBTL Scheme zawm tawh hi consumer 1,07,564 an awm tawh a, Mizorama LPG Consumer awm zawng zawng 2,56,803 atanga chhutin za zelah consumer 41.88 in he scheme hi an zawm tawh niin a lang a ni, a ti.
National Payment Corporation of India (NPCI) ah Mizoram Rural Bank leh Mizoram Cooperative Apex Bank te an la in register loh avanga mipuite harsatna tawh chungchang Meeting hmasa a ngaihtuah tawh chu Mizoram Rural Bank hian NPCI ah an ti fel tawh a, circular pawh a chhuah tawh a, Mizoram Cooperative Apex Bank pawhin March ni 13 khan registration an nei tawh a, vawiin lam hian IOC ah an lehkha te an thehlut dawn a, hei hian chak lehzual in DBTL Scheme chu kan kalpui theih a rinawm a ni, a ti.
April ni 1 atangin grace period a tawp dawn avangin nakin zelah consumer ten harsatna an tawh loh nan cash memo te hi mipuiin lak nachang kan hriat leh gas agent lam te pawhin a pek nachang an hriat a pawimawhin a tul a, hei hian nakin zelah gas sem dan kalphung leh subsidy consumer te account a lut tur a ti awlsamin a tiphuisui thei zawk dawn nia a rin thu Minister hian a sawi bawk. IOC lam te pawh an inpuahchahna a that tawk lo avanga harsatna thenkhat awm nia a rin thu Minister chuan sawiin gas agent leh Sawrkar chuan hemi chungchangah hian mipuite harsatna sutkian nan theihtawp an chhuah a ni, a ti.
Gas agent lam te chuan application pending an neilo thusawiin application an hmuh te chu system ah consumer te bank account a fel chuan an thun nghal zel thusawiin mipui lam atangin form a lut chak lo nia an rinthu an sawi a, bank account number 11 (SBI leh MRB) leh number 15 (Apex Bank) te ziak dik turin mipuite an ngen a ni. Meeting ah hian gas connection transfer leh hmingthlakna chungchanga phunnawi leh harsatna awm chu zau taka sawiho anih hnuin harsatna awmte chiang lehzual a hriat anih theih nan leh hemi hi awlsam zawka chinfel anih theih nan IOC aiawh, Department aiawh, MCU aiawhte hovin gas agent hrang hrangah a takin(practical) connection hmingthlakna hi tih chin nise tih an rel a ni.
Gas connection transfer leh hmingthlakna chungchangah hian chhungkaw chengho ah subscriber hmingthlak ah fee chawi a awm lova, chhungkaw zing a mi, subscriber a boralin a chhungkaw zinga mi tupawhin a hminga a thlakin fee chawi a awm lova mahse hemi atann hian Death Certificate leh self declaration form te a ngai a ni. Chhungkaw member nilo, midang hnen atanga lei, hmingthlak ah security deposit chawi belh tur a awm a, chu chu a neitu hmasa in a gas connection a neihna a rei leh rei loh a zirin a inang lo a ni. Mahse form ah leh system ah he thil hi a inang loh vangin harsatna a awm fo thin a ni. Form leh System ah thil inang lo hi IOC lama thlen nise tih rel a ni bawk.
LPG Distributors te zingah Internet Connectivity neilo chungchang Meeting hmasa a rel tawh angin Connectivity neilo heng khua Bungtlang ‘S’, Sakawrdai, Sangau, Tuipang leh Ngopa te hian Department ah rawn in report in IOC hotute ah ziakin thlen tawh a ni a, amaherawhchu IOC lam atangin hemi chungchangah hian tun thlengin thu leh hla engmah dawn a la ni lo.
Refill booking hi Internet kaltlanga online booking, SMS, IVRS leh Mobile application hmanga tih theih tura duan a ni a. Mizoram tan IOC hian Mizo tawnga hman thei tur IVRS number an la siam lova, hei hi siam turin IOC hotute ah ngenna thehluh tawh a ni. Consumer ten SMS Refill Booking an tih theihna turin Gas Distributor zawng zawngte mobile number an showroom ah March thla ral hmain tarchhuak tur a tih an ni bawk.
