Vawiin chawhma khan Government Champhai College Multipurpose Hall-ah National Drinking Water & Sanitation Awareness hapta hawnna neih a ni a. He hunah hian Champhai DC Pu H Lalengmawia IAS chuan khuallian niin a hman pui a ni.

Khuallian chuan faina chungchang hi Sorkar laipui chuan ngai pawimawhin kum 1954 daihtawhah Rural Sanitation programme duangin bul a lo tan tawh thu sawiin, fai tur chuan tui thianghlim kan neih hmasak a ngai a ni, a ti a. Mizoram chhunga luitui lo kiam zelah hian mitinin mawhphurhna a nei tih kan hriat thar theuh a ngai a, PHE Department- in mipui kham khawp tui min pe thei lo a nih pawhin ruahtui khawl zawngin tan kan la ve thei a ni,  a ti a. Kan tui tlan te'n kiam lam an pan zel chuan Mizoram hi hmun ralmuang lo takah a ding mai dawn a ni, Pu H. Lalengmawia chuan tiin, tui thianghlim tam zawk nei thei tur chuan kan khawsak phung hi kan thlak a ngai a ni tiin kalkhawmte chu a bul tan tu leh midangte entawn tlak ni turin a sawm a ni. Champhai a lo fai zawk theihna turin Ui leh Ar khuahkhirhna dan leh kawngkama bunhraw dah khapna thupek chhuah a, dan ang taka kalpui a nih tur thu Champhai DC chuan a sawi bawk.

Vawiin hun hi Pu Lalrammawia, SE PHE Department chuan a kaihruai a. Champhai tui tlan mek Tuipui lui chu kum 20 chhung lekin a tam lam 75% in a hniam tawh thu tarlangin, kum 20 lo kal leh turah chuan a kangchat mai ang tih a hlauhawm thu a sawi a. Kan tu leh fa ten tui in tur thianghlim leh tam zawk an neih theihna turin vawiin hi bul tanna ni tura a duh thu a sawi a ni.

He hunah hian mi sawm bikte atangin zirtirna hrang hrang ngaihthlak a ni a. Dr J. Lalramchhuanga hnen atangin "Bawlhhlawh leh natna hi unau an ni" tih thupui hmanga zirtirna a buatsaih chu ngauhthlak a ni a. Associate Prof. P Lalhmingliana'n "Tui thianghlimlo hi natna thlentu a ni" tih thupui a sawi a. "Zun leh ek thlahdah suh" tih thupui Pu VL Chama Hnamte, President Sub Hqrts YMA Champhai atangin ngaihthlak a bawk a. Pi Lalhmachhuani, Sub Hqtrs MHIP Secretary chuan "In leh a vel vawng fai rawh" tih thupui a sawi ve bawk. Pu Lalnunmawia Principal Govt Champhai Colege chuan lawm thusawin he hun hi a khar a ni.