4472/2024-2025

Aizawl, 28th February, 2025 :  Pu H.K. Lalhawngliana, Commissioner of State Tax, Finance Department (Taxation) chuan vawiin khan Central Young Mizo Association (CYMA), Mizoram Merchant Association (M.I.M.A), Mizoram Truck Owners Association (M.T.O.A) leh Mizoram Chemist and Druggist Association (MC&DA) aiawhte chu a office chamber, MINECO-ah a kawm a, dan lova Mizorama bungraw lakluh tih tawp a nih theih dan tur an sawiho a ni.

He inkawmhona ah hian Pu H.K. Lalhawngliana, Commissioner of State Tax chuan chhiah lakna dan zawm lova State pawn atanga bungraw lakluh a awm tawh loh nan, Mizoram Goods and Services Tax Act, 2017 and Rules hnuaiah khauh zawka enfiah a nih tawh dawn avanga mipuite hriattir lawk a tul thu uar takin a sawi a.

Mizoram Goods and Services Tax (MGST) danin a phut angin sumdawngte leh bungraw phur luttute’n State pawn atanga bungrua an lak luhin heng documents - e-waybill, GST tax invoice leh bill of supply (exempt-ah) te hi an  nei ngei tur a nih thu  Commissioner of State Tax hian a sawi a. Heng document-te leh an bungraw phurhte hi a dik ngei em tih enfiah nan Vairengte-ah Data Collection Centre din a ni a. Tun dinhmunah hian dan zawm lova buangraw la lut an tam hle ni a hriat a ni a, hemi avang hian kan State-in chhiah a dawn tur ang a dawn loh phah thin a ni a ti a. Thawktu indaih lohna avangin Vairengte Data Collection Centre-ah duh ang thalin enfiahna hi kalpui theih a ni thin lova. Hetih rual theihtawpin hma an la a, April, 2025 atang chuan uluk leh khauh taka kalpui an tum tawh thu a sawi a. Hemi venpui tur hian NGO leh pawl hrang hrangte, Sumdawngte leh mipuite kan tan ho a tul hle tih sawiin; chhiah luangral tur ven kawngah sawrkar hmalakna tanrualpui-ah a sawm nghal bawk.