4471/2024-2025

28th February, 2025 : Vawiin ni 28th February, 2025 khan Tourist Lodge, Chaltlang-ah Mizoram Horticulture Service Association ten 27th General Conference an hmang.

He hunah hian Horticulture Minister Prof Lalnilawma chu Khuallian a ni a. Horticulture officer khawmpuiah hian thupui atan "Sustainable Development of Horticulture in Mizoram" tih hman a ni.

Prof. Lalnilawma chuan MHS Officer te hnenah chu sorkar Handholding scheme ah theihtawp an chhuah avangin lawmthu a sawi a. Horticulture department hmalakna avanga thlai tharah hmasawnna nasa tak Mizoramin a chan mek thu leh kan thlai thar hlawk zawka hralh anih theih nana thlai senghnua sawngbawl dan Post harvest lama hmalakna leh hmachhawp awm mek te a sawi.

Dragon fruit powder siamchhuah leh thlai panga- sawhthing, mizo hmarchate, sapthei, dragon fruit leh lakhuihthei hralhchhuahnaah Reliance company te nena thawh ho mekna te a sawi a. Thawktute chu hmasawn zel turin thil a pangai renga kallo in, ngaihtuahna ti thar a innovative idea nei zel turin a fuih bawk. An hmalakna reng reng ah Kuthnathawktute tan thawkin, theihtawp chhuah zela Kuthnathawktute hlawkna thlen zel turin Mizoram Horticulture Service Association member te a fuih.

Pi P C Lalnghahsangi, Project Officer, COE Thingdawl in Conference theme sawizauna presentation pe in, horticulture schemes chak taka kalpui avanga Mizoram hmun hrang hranga thei leh thlai chingtute hmasawnna ngaihnawm tak tak te ngaihthlak in thlir ho ani.

MHSA General Secretary Pu Manthanga Tochhawng leh Treasurer Dr. Carmelita L. Pachuau te hnen atangin report ngaihthlak ani a. MHSA Secretary chuan pension a chhuak an awm chhoh reng avanga MHSA member tlakhniam chak zia leh tun dinhmunah Sanctioned posts zat atanga chhut a tlem te chauh hnawhkhah anih a sawi a. Junior post a chem hriam lai ber post ah indaihlohna nasat avangin officer thar lak a tulzia sawi.

Conference chawhnu session ah member pension thlahna neih niin, Conference theme chungchang sawi hona te, rorelna hun hman a ni a. MHSA Office Bearer inthlanna nei chhunzawmin conference hun hi khar a ni.