No.1165/2020-2020

COVID-19 Committee on Psychological & Social Guidance chuan COVID-19 avanga State danga tangkhang lo hawte a lo lawm a. Mizoram i lo thlen hian, ram a him theih nan thawhpui atan kan sawm nghal a che.

Zirna, hnathawh leh pawimawh dang avanga ram pawna khawsa, chhungkua leh ram nghahfakte in ni a, kan chhuang hle che u a ni.

Zoram pawn hmun hrehawm zawkah inkhuahkhirhna chhawng thum in tawrh chhuah te, haw kawnga harsatna tam tak in paltlangte kan hre reng a, in chhelna kan va ngaihlu em!

Mahni ram ngei thlen hnuah, mahni in lum pan nghal thei lova Quarantine Centre-a invawm luh ngai hi hrehawm kan tihpui che u a, harsatna hi mi tinin kan tawk a, chhel takin, mi dang ang thovin tuar hram hram ang che. He hun khirhkhan hian tawp hun a nei dawn si a.

Quarantine Centre hi COVID-19 laka kan him nan, kan ram a him nan, fimkhur vanga din, Sorkar hmalakna, Kohhran leh Tlawmngai Pawl ten an enkawlpui a ni a, sum tam tak senna a ni. Quarantine Centre -a awmte hian novel Coronavirus in rawn luhpui tihna a ni lo.

State pawn lamah tangkhang dang, lo haw tur tam tak an la awm a. Chungte entawntlak leh fuihtu tha tak ni turin inbuatsaih tan rawh le.

Quarantine Centre-a in awm chhungin inkaihhruaina leh hotute thu dawhthei taka zawm turin kan inngen a, Mizoram hmingthatna ber Thuawihna vawng tlat turin kan insawm a ni.

Ram pawn hmun changkanga khawsa hang/hin in nih avangin mahni awmna hmun leh inthiarna vawnfai kawngah fuih ngaiah kan ruat lo che u.

Quarantine Centre -a awmte hi COVID-19 darh thut thei laka venghimtu leh ral beitu Pasaltha (Warrior) in ni. Warrior dik tak chuan nakin huna a kal zel dan tur ruahmanna fel tak a siam thin.

Quarantine Centre hi Sorkar In, Zirna In leh Kohhran hmunte an nih hlawm avangin, bungraw zah tur te, dimdawi tur te, zuk leh hmuam kawnga fimkhur thiam tur tein kan inngen a ni. Engmah hi man lova lo awm tawp a ni lo tih hriain engkim renchem hram hram a tha.

Hun harsaah hian thinchhiat leh vuivai a awl. Amaherawhchu midangte zaingai thiam, hrawn nuam, boruak mila insiamrem thiam, midangte tihlimtu leh thlamuantu nih i tum heuh ang u.

Mutna, ei leh in leh thildangah mahni in tluk a awm lo tih kan hriatpui che u a. Sorkarin a rualkhai thei ang berin min hrut tih hriain duh tui lutuk tum lo hram hram ang aw. Ram rethei kan ni tih hriain Sorkar hmalaknaah lungawi zel i ching ang u.

Ei leh in tur neih te, ei leh in theia awm te hi a hlu. Ninawm leh hrehawm hre theia kan la dam te hi a lawmawm a ni. Lockdown hre hman lova mual liam an tam mai.

Tuna kan khawharna te leh hrehawm kan tawrhte hi keimahni mimal himna, kan chhungte leh kan ram himna tur, nakina kan lawmna tizualtu leh kan chatuan sawi la tling tur a ni. Chuvangin i thil tawnte chhinchhiah ngun rawh.

Rilru hlim leh zangkhai nei turin pawn lam thiante, unaute leh chhungte nena cellphone hmanga inbiak te hi a tangkai hle. Khawiah pawh midang tihlimtu kan ni thei.

Quarantine Centre -a awmten rilru leh taksaah harsatna kan tawk thei a, nangmahni tanpui turin duty an awm reng a ni. Nangmah ngei pawh mite harsatna hriatthiampuitu, tanpuitu leh chhawk zangkhaitu i ni thei a nia.

Mi hrang hrang, ze hrang hrang neite ni mah ila, kan inanna lai- Harsatnain a tlakbuak Zofa vek kan ni tih hre rengin, dawhtheihna nen inngeih tlang takin awm kan tum dawn nia.

Quarantine Centre chhuahsan hnu, mahni inah inkulh hranga, mahni inven leh invawn fimkhur a ul hunah pawh entawntlak ni zel turin kan duhsak che u a ni.

Quarantine Centre-a awmte hi kan chhungte bakah mi tinin min khawngaih a, min lainat a, min duhsak a, min tawngtaisak hin bawk. Chhungte rilru tihrehawmtu leh mi dangte tana phurrit siamtu i ni lo ang u.

Lockdown bakah Quarantine period paltlang tawhte hi chuan eng harsatna pawh an paltlang thei ang. Chuvangin Quarantine hun a zawh hnuah pawh COVID-19 dona kawnga theihtawp min chhuahpui turin Committee on Covid-19 Psychological & Social Guidance chuan a sawm che u a ni.