2075/2025-2026

Aizawl the 28th October 2025: Vawiin khan Art & Culture Department kaltlanga din Committee on "Hnam Tobul Zawn Chhuah" te chu an Chairman Pu Lalduhoma, Chief Minister hovin CM Conference Hall-ah a tum khatna atan an thukhawm. A taka hnathawktu tur mithiam dap khawm hna thawk turin Art & Culture Department chu hma lo la turin an ti.

Chief Minister chuan, Committee member-te chungah lawmthu a sawi a. Sorkarin a pawmpui tlak hnam tobul leh chanchin kimchang zawk, Mizo hnam peng hrang hrangte huapzo, tunlai thiamna thar ber ber te hmang ril zawka chhui hi tul kan ti a. A tul a nih chuan hnam dang mithiam rawih huamin, scientific taka chhui a tulna kawngah pawh inhawng takin hma kan la dawn nia, a ti.

Minister Pu C. Lalsawivunga pawhin, he hmalakna hi kan mithiamte rinchhan hmalakna a ni a. A thiam leh tui, inpe taka hnathawk thei tur kan mamawh a ni, a ti.

Pi Zodingliani, Secretary, Art & Culture-in report a pek hnuah member te hian a bul tan dan tur an rel a. History chhui dan peng hrang hrang hmanga hmalak a nih theih nan a taka hnathawktu tur mithiam fawmkhawm phawt ni se an ti a. Minister Pu C. Lalsawivunga kaihhruaina hnuaiah Art & Culture Department chuan an tam lam bituk nei lovin hnathawk thei tur mithiam lo zawng khawm hmasa se, an inpeih hunah thutkhawm leh ni se, an ti.

An hnathawhna tur sum leh pai an mamawhte hi Ministry of Tribal Affairs hnuaia Support to Tribal Research Institute atanga hmuh theih beisei a ni.