2074/2025-2026
28th October, 2025 : Food & Drugs Administration Wing (FDA), Health Department chuan a hnuaia tarlan ang hian Mizoram chhunga damdawi quality endik kawnga hman an lakdan an tarlang.
Damdawi tel lovin damlo enkawl dam tak tak theih a ni lo. Damlo a dam theih nan doctor leh thawktu dangte an tanrual a ngai a, khawl tha leh changtlung ber berte hmanga beihna piah lamah, damdawi quality tha (standard drugs) ngei damlovin a ei a ngai a ni. Damdawi siamtu Company India ramah hian sing chuang an awm a, Company tha leh changtlung nia chhiar theina tur WHO-GMP/Revised GMP standard tling turin tan lak chhoh mek reng a ni.
Damdawite hi a siamna hmanrua (raw-materials) zawng zawng test hmasa thlapin, siam a ni thin a. Siam lai mek (half finished) pawhin test tur a ni a, siam zawh tawh pawh hralhchhuah a nih hmain test leh thlap tur a ni. Test a paltlang chauhvin hralhchhuah tur a ni. Amaherawhchu, Company-ten chung thil chu an zawm thlap thlap em tih erawh ngaihtuah tham a ni a, dan zawm tha tawk lo awm palh theih a ni. India ramah hian damdawi lem (spurious drugs) hmuhchhuah a awm zauh zauh va, chungte chu damdawi siam phalna licence pawh neilo, a ruka siamtute thil tih a ni thin a, chungte chu pawn lam landanah chuan damdawi tha pangngai ang mai an ni thin a, laboratory-a test a nih loh chuan hmuhchhuah a har em em a ni. Hetiang a nih avang hian kan rama damdawi kan hmuhtheihte hi damdawi dik an ni em tih leh standard drugs an ni em tih hriat nan damdawi a tam thei ang ber test thin a pawimawh a ni.
Damdawi quality endik chungchanga mawhphurtu chu Food & Drugs Administration Wing (FDA), Health Department hi a ni a. Anni hian sawrkar-in supplier-te hnen atanga a lei damdawite leh mimal pharmacy-a zawrhlai damdawi sample-te lain, laboratory-ah an thawn thin a, Mizoramah damdawi quality test-na kan la neih loh avangin Regional Drug Testing Laboratory (RDTL), Guwahati-ah thawn thin a ni.
Damdawi quality test State danga thawn ngai a nih avangin senso a tam hma em em a, duhthusama tam test ngawt a remchang thin lo a ni. Sawrkar damdawite chu a thlawna lak niin, thawn man leh test-man bak sum senna dang a awm lo va. Damdawi dawra zawrhlai test chungchangah erawh a man pek a ngai a, damdawi man to deuhvah phei chuan senso a sang hma hle a ni. State budget atanga sum hmuh a tam loh avangin FDA hian duhthusamin damdawi an test tam thei thin lo a ni.
Kum 2024 October thla atangin Internal Performance Agreement – Mizoram Health Systems Strengthening Project (IPA-MHSSP) hnuaiah Damdawi Quality Endik hi rin luh a lo ni ve ta a. Damdawi test-na senso tur sum a awm chinah FDA chuan hma a la chho ta a, damdawi quality test zat nasa takin a pung ta a, a thlamuan thlak hle mai. Regional Drug Testing Laboratory chauhvin Mizoram atanga damdawi sample thawn an test sen loh avangin NABL Acredited Private Laboratoty EFRAC, Kolkata-ah sample thawn a ni ta bawk a ni. Hetianga laboratory pahnih hman a nih tak avang hian sawrkar damdawi dahkhawlna Central Medical Store atanga hmun hrang hranga thawndarh a nih hmain supplier-ten an dah hlimah sample lak nghal zel tura ruahmanna kalpui a ni a. Amaherawhchu, beisei aia result a rawn thlen tlai hret thin avangin tum angin kal theih a ni ta chiah lo va. Hei hian Mizoramah ngei laboratory kan mamawhzia a lantir chiang hle a ni.
IPA-MHSSP hnuaia hmalak a nih hnua damdawi sample test dan dinhmun chu hetiang hi a ni - kum 2022-23 chhungin sample 106 test a ni a, kum 2023-24 chhungin 121, IPA-MHSSP(Oct.’24- Sept.,’25) ah chuan damdawi 800 zet test a ni ta.
Damdawi sample test tura lak hi a tam ber chu sawrkar supply damdawi - Hospital/CHC leh PHC hrang hranga sem te an ni a, health facility-ten IPA sum hmanga local purchase an neihte pawh test an ni. Heng bakah hian damdawi dawr (pharmacy) pangngaia zawrhte pawh test thin an ni bawk. India sawrkarin damdawi man tlawm Pradhan Mantri Bhartiya Janaushadhi Kendra-a zawrh Generic drugs-te hi a man tlawm avang ngawta hnualsuat tur an ni em tih fiah nan test tura sample lak thin a ni bawk. Laboratory test result atanga a lan danin damdawi mantlawm (Generic drugs) ho hi a man a tlawm avang ngawta hnualsuat tur a nih lohzia hmuh a ni. IPA-MHSSP hnuaia hmalak hnu (Oct.,’24 to Sept.,’25) chhunga damdawi test result dinhmun chu hetiang hi a ni :-
Damdawi man tlawm test zat - 100
Quality tha lo (Not of Standard Quality) - 2 (2% )
Damdawi pangngai test zat - 700
Quality tha lo (Not of Standard Quality) - 21 (3%)
Damdawi sample 800 zet quality endikah hian a lem (spurious) hmuh a ni lo va. Not of Standard Quality tia laboratory-in result a pekte hi Drugs & Cosmetics Act, 1940 and Rules, 1945-in damdawi mal te te standards atana a bituk tling zo lo an ni a, ei atana tlak loh tihna a ni.
Hetiang hi kan dinhmun anih avang leh ramchhung state thenkhat a damdawi thalo avanga harsatna an tawh mek ang hi kan State a thleng ve thei anih avangin hriselna lama thawktute leh a hmangtu mipuite pawh in kan damdawi ei turah kan fimkhur lehzual a pawimawh hle awm e.
