Mizoram Legislative Assembly hnuaia Committee peng pakhat Pu Lalrinliana Sailo kaihhruai Committee on Public Undertaking member-te chuan vawiin chawhma khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu a pisaah hmuin, Bangladesh nena insumdawn tawnna chungchang an sawiho.

He inkawmnaah hian Governor chuan thenawm ramte nena insumdawng tawn turin enge kan ramin  a mamawh a, enge a hralhchhuah theih kan hriat hmasak a ngai a ti a. Mizoram tihmasawn tur chuan kan thenawm ram Bangladesh leh Myanmar, ramri hrula hmunte chu tihhmasawn phawt a ngai a ni, a ti. Hemi chungchanga hma la tur hian Governor chuan sawrkar laipuia a lo thlen tawh thu sawiin, Act East Policy nen pawh a inrem hle a ni, a ti. India rama state ralmuang berte zing ami a nih angin, Mizoram chu  hmarchhak bial atanga Act East Policy tihlawhtling theitu candidate tha ber a nih thu a sawi bawk.

Committee member-te chuan India ramin zalenna a neih hnua ram thendarh a nih hnuin, hmarchhak bial chuan a dinhmun ngai a awh phak tawh loh thu an sawi a. Integrated Check Post dinna tura ruahman  Thegamukh (Bangladesh) leh Kawrpuichhuah (Mizoram) te chu a hmun ngeia enfiah pui turin an sawm a ni. Cultural exchange leh trade conclave te buatsaih tha an tih thu sawiin, High Commissioner of India to Bangladesh pawhin a ngaihven thu an sawi a. Tun aia chak zawka sawrkar laipuiin hma a lak theih nan theihtawp chhuahpui turin an sawm nghal a ni.

He inkawmnaah hian MLA - Pu Lalrinliana Sailo, Pu Vanlalzawma, Pu R.L. Pianmawia leh Pu Lalrinmawia Ralte te bakah official thenkhatte an tel a ni.