Nimin tlai khan zan 1 riak tura lo kal Committee on Shelter for Urban Homeless Member te chuan CPD (Centre for Peace and Development) Transitional cum Children’s Home, Saron Veng leh Aizawl Shelter Home, ITI an tlawh.
Committee Chairman, Justice Kailash Gambhir chuan naupangte tan intihhlimna leh infiamna hmun tha neih a pawimawh thu sawiin hemi kawngah hian Home enkawltute chu tan la turin a chah a. Home enkawltute nen hian inkawm hona nei nghalin he hunah hian an dinhmun leh mamawh hrang hrang sawina an nei a ni.
CPD Transitional cum Children’s Home leh Aizawl Shelter Home te hi Sawrkar laipui scheme – Integrated Child Protection Scheme (ICPS) hnuaia kalpui niin Sawrkar laipui leh Non-Governmental Organisation (NGO) te’n 90:10 in an intum sem a. Tun dinhmunah hian naupang 15 ve ve an awm a. Naupang te tan Vocational class kartin neih thin niin an thil siamte pholanna (exhibition) an nei thin bawk .
He hunah hian Hon’ble Justice Kailash Gambhir (Chairman), Pu Neeraj Kumar Gupta (Member Secretary), Pu Rakesh Ranjan Barik National Mission Manager (C&KM) bakah UD&PA hnathawkte an tel a. Chief Secretary, Pu Lalmalsawma chuan Aijal Club-ah zanriah a buatsaih sak a ni.
