Mizoram khawpui hrang hranga chenna in neilote (urban homeless) dinhmun zir chiang tur leh hemi chungchanga hmalakna hrang hrang ngaihven turin Supreme Court committee din Committee on Shelter for Urban Homeless member-te chu Justice Kailash Gambhir hovin vawiin khan Aizawl an lo thleng. Vawiin chawhnu vek khan Secretariat Conference Hall, Aizawlah Mizoram sawrkar hnuaia Department hrang hrang hotulute leh home enkawltute an kawm nghal a. Inkawmhona hi UD&PA Secretary Dr.C Vanlalramsanga'n a kaihruai a ni.
Committee on Shelter for Urban Homeless hi November ni 11, 2016 khan Supreme Court of India in a din a. Khawpuia mi rethei, chenna in neilote dinhmun zir chian bakah National Urban Livelihoods Mission (NULM) hnuaia Scheme of Shelter For Urban Homeless (SUH) state sawrkar ten an kalpui dan enfiah turin member-te hi an lokal a ni. Committee member lo zin te chu- Hon'ble Justice Kailash Gambhir, Former Judge of the High Court of Delhi - Chairman; Neeraj Kumar Gupta, Retired Officer of Delhi Higher Judicial Service - Member Secretary leh Sanjay Kumar, Joint Secretary, Ministry of Housing & Poverty Alleviation - Member te an ni a. Rakesh Ranjan, National Mission Manager (C&KM) pawhin Committee Member te hi a tawiawm a ni.
Justice Kailash Gambhir chuan sawkar leh tlawmngai pawl thawhhona leh chanhaite tana an inpekna lawmawm a ti a. Sawrkar chauh nilo mipui mimirin chanhaite leh mi harsa zawkte tana inpek hi kan mawhphurhna a ni, a ti.
Vawiin vek khan Committee on Shelter for Urban Homeless member te hian Chief Secretary Pu Lalmalsawma chu a pisaah kawmin Mizoram dinhmun an sawipui a. Motherless Baby Home, Khatla, Gan Sabra, Luangmual West, Aizawl Shelter Home, ITI leh CPD Transitional cum Children’s Home, Saron Veng te an tlawh nghal bawk a ni. Naktuk 5th May 2017 hian Abundant Life Home, Durtlang, Hermon Children’s Home, Durtlang leh Bethsaida Children’s Home for Physically Challenged te an tlawh dawn bakah UD&PA Department hotute nen Mizorama DAY-NULM project kalpui mek dan an sawiho dawn a ni. Chawhnu lamah Lengpui Airport panin Aizawl an chhuahsan anga, Rangvamuala hnathawhna tur hmun an enfiah hnu ah New Delhi lamah an haw leh dawn a ni.
Deendayal Antyodaya Yojana-National Urban Livelihoods Mission (DAY-NULM) hi Ministry of Housing and Urban Poverty Alleviation hnuaia Sawrkar Laipui Flagship Programme pawimawh ber pakhat niin, 24th, September, 2013 khan India ram ah bul tan a ni. Mizoram ah pawh UD&PA Department in he Mission hi kalpuiin, Sorkar laipui duh danin Mizoram State Urban Livelihoods Mission Society (MzSULM) chu 30th, October 2014 ah Mizoram Societies Registration Act, 2005(Act No. 13 of 2005) hnuai ah din fel ani bawk. NULM hian sawrkarlaipui in a hunrei tak a lo kalpui tawh Khawpui retheite chawikanna Programme SJSRY chu a rawnthlak ta a ni.
