DDK Aizawl chuan Commonwealth Games hawnna Opening Ceremony leh a kharna Closing Ceremony bakah infiamna zawng zawng final Live-in a pe chhuak dawn a. October ni 3 (Pathianni) tlai dar 6 leh zan dar 10 inkarah Opening Ceremony hi Jawaharlal Nehru Stadium, New Delhi ami Live-in a pe chhuak ang a, October ni 14 (Ningani) ah New Delhi atangin Closing Ceremony tlai dar 6 leh zan dar 7 inkarah Live-in a pe chhuak bawk ang. Games neih chhunga infiamna zawng zawng final Live-in a pek chhuah a nih bakah October ni 4 atangin ni 15 thlengin zan tin zan dar 11 leh dar 11:30 inkarah CWG highlights pek chhuah a ni ang a. Zan tin dar 11:30 atanga zanlai dar 12:30 thlengin International highlight pek chhuah thin a ni bawk ang.

Doordarshan chauh hian National Broadcaster a nihna angin Commonwealth Games hi Live-in a pe chhuak dawn a. Tun hmaa la hman ngai loh High Definition TV hmangin CWG inkhelhna hrang hrang hi chhuah a ni dawn a. DD National bakah DD Sports (darkar 24), DD-HD, DD-Urdu, DD-Bharati leh DD-News Channel ah te chhuah a ni ang. CWG chhung hian DDK Aizawl programme pangngai zan dar 6 leh dar 8 inkar ami te pawh tih danglam nual a ni ang.