Vawiin chawhnu dar 2:30 khan Government Higher Secondary School Hall, Mc Donald Hill-ah October ni 3, 2010 a Commonwealth Games Opening Ceremony, New Delhi-a neih tura Mizoram aiawh a Cheraw (Bamboo Dance) kan tura Mizoram Sawrkarin a thlante chuan final rehearsal an nei a, Art & Culture Minister Pu PC Zoram Sangliana'n a hmunah kalin a telpui.

Minister chuan Commonwealth Games-a thalaiten Mizo hnam lam mawi tak leh khawvel record kan siamna "Cheraw" an kan theihna tur a hma lak sak a, sum leh pai petu Mizoram Chief Minister, Finance leh Planning changtu ni bawk Pu Lal Thanhawla hnenah lawmthu a sawi a, cheraw kan tur Mizo thalai rualte chu Delhi Commonwealth Games hawnna inkhawm a tel tura thlan an nih avanga a lawmpui thu sawiin, Mizo hnam lam mawi tak (Cheraw) khawvelin a hmelhriat tawh zuk tarlang nawn satliah mai tur ni lova, record thar chhuanawm tak 'Mizo thalaite hi discipline nei tha, nungchang mawi leh hawihhawm' an ni tih khawvel pum ami te hnena phochhuak tura invawng uluk turin a chah a, an kalna apiangah mizo hnam tihmingchhetu a tang lo turin leh, Kristian an nihna pholang a, Isua hming tichhe zawnga khawsa lo turin a chah bawk.

Commonwealth Games hawnna a Mizoram aiawh a cheraw kan tur te hi Mipa 40 leh Hmeichhia 40, an vaiin mi 80 an ni a, Art & Culture Department a instructor ten ngawrh takin lam an zirtir thin a ni. ruahman lawkna ang chuan karleh inrinni (28th August, 2010) hian Delhi pan turin Mizoram an chhuahsan ang a, India rama hnam hrang hrang 70 aiawhte nen Games hawnna ah a huhova lam tur an nih avangin, Games hawn a nih hma thla khat chhung vel a huhovin mithiam bikte kaihhruaina hnuaiah lam an zir leh ang.

Mizo thalai cheraw kan tur te hi Team Leader Pu Lalchuailova, Research Officer, Art & Culture Department leh Pi Ngurmawii Ralte, Instructor, Art & Culture Department  ten an hruai ang.