Vawiin khan Pu Lalkhama, Vice Chairman, Mizoram State Planning Board pisaah Mizoram-a communitization leh decentralization hman dan tur chungchangah meeting neih a ni. Hetiang kalphung hi Nagaland state-ah chuan hlawhtling taka hman mek a ni.

Hemi chungchang zir chiang tura Mizoram sawrkarin a ruat anga Nagaland han tlawhtu Pu Joseph Lalhimpuia, Vice-Chairman, Lunglei High Power Committee chuan an thil humh dante report a pe a. “Mizoram-ah pawh hian communitization leh decentralization hi kalphung fel taka hman theih niin a lang a. Nagalnd pawhin sawrkar leh khawtlang inrelbawlna fel tak an neih phah a, hma an sawn phah em em a ni” a ti.

He thil zirchiang tura Chief Minister pawmpuina a din Committee-in Empowerment of Community chungchanga draft report a siam chu meeting-ah hian thlirho a ni a. He policy duan chhin hian a tum ber chu thingtlang leh khawpui thenkhata mipui te hnena thuneihna sang zawk pek dan tur chungchang a ni a. Khawtina school, sub-centre, tui supply, electric leh kawng te a khaw mipui ten neitu nihna rilru pu chungin enkawl zawk sela, hemi atan hian a tul ang zelin thuneihna leh sum te pawh an kutah hian pek nise, rampum tan a that zawk a beisei awm thu an sawi.

Draft report hi pawm niin remchang hmasa ah sawrkara thehluh nise tiin an rel.

He meeting-ah hian Department sawm bikte atangin Secretary leh Director te an tel a; Mizoram sawrkar hnuaia subject thenkhatah te he kalphung hi hman ve a nih theih dan turte an sawiho a. Mizoram-ah pawh a tul ang leh a theih ang chinah kalpui ve ngei ni se thaa an hriat thu meeting-ah hian an sawi a ni.