Mizoram Excise & Narcotics Department-in Meghalaya state Excise & Narcotics Department hnuaia hnathawkte tan NDPS Act 1985 leh a kaihhnawih thil chi hrang hrang chungchanga ni li(4) chhung awh tur Training (30th October – 2 November ) an buatsaih chu vawiin khan I & PR Conference Hall a tan a ni. Training hi Pu Lalbiakmawia Khiangte, Commissioner of Excise & Narcotics in a hawng a ni.

Training hawnna programme ah hian Pu Lalbiakmawia Khiangte chuan United Nations Covention-in drugs dona tura thuthlung a siam na ah hian India hi signatory zing ami anih thu sawiin Mizoram hi international boundary thui tak in a hual anih avangin, ven pawh a hau tak hle a ni, a ti a. Myanmar atangin Heroin a lo lut a, kan thenawm state Manipur atangin Ganja a lo lut thla a, Assam atangin ruihhlo dang alo lut nasa hle a, heng ruihhlo te hian kan thalai te nunna tam tak a la a ni, a ti bawk.

Tunlai hian damdawi ruihhlo Amphetamine leh Metamphetamine siam nan a hman Pseudoephedrine telna damdawi chi hrang hrang chu Mizoram kal tlangin Myanmar lamah tawlh luh anih thu Commissioner of Excise & Narcotics hian a sawi a. Heng ruihhlo lo lut te hi Mizoram a Law Enforcement Department, Para Military Force te leh tlawmngai pawl ten theih tawp chuah a an man thin thu a sawi bawk a ni.

Mizoram Excise & Narcotics Department atanga training la turin Meghalaya Excise & Narcotics Department atangin Asst. Commissioner – 2; Superintendent – 2; Dy. Superintendent – 2 leh Inspector – 4 te an lo kal a ni.