Ni 14-27 .November 2012 chhung hian Pragati Maidan New Delhi ah India International Trade Fair-2012 (IIFT-2012) neih a ni dawn a, he hunah hian India ram chhung hmun hrang hrang leh India ram pawn atangin mi tam tak an kalkhawm ang  a, an thil neih leh siam chhuahte an pho chhuak leh dawn a ni. Mizoram Sorkar pawhin sum harsatna tam tak karah thilsiam hmanga ei zawng tute hma ngaiin Industries Department kaihhruaina hnuaiah mi 20 chuang zet tirh ve a tum a ni. Heng Mizoram aiawh turte hian Puan chi hrang hrang leh mau, hnang leh thing a thilsiam chi hrang hrangte bakah Hnamchhantute Hmunphiah siamte sawhthing leh Aieng rote an pho lang ve dawn bawk. Khawvel huap inhmuh khawmna a telve  hi  kawng hrang hrangin thilsiama  eizawngtute  leh sumdawngtute tan a hlawk thlak em em a, hawn ni atang a ni 3 vel thleng hi sumdawngtute tan hauh a ni a, a bak zawng hi mipui a duh  apiang tan tlawh theih a ni. Mizote hian miten eng tin nge hna an lo thawh tihte en leh zir nachang hre ve ila a tam thei ang berin he Trade Fair hi tlawh duh tute lo tanpui leh kaihruai turin Industries Department Officerte an duty reng dawn a ni.

Mizoram aiawh a kal turte kawmna hun hi Ni 30.10.2012 zing dar 11 khan Pu PC Lallawmsanga IPS Principal Secretary ,Industries chuan a Office-ah a nei a, sum harsatna karah Sorkar-in a duhsakna hre renga he Trade Fair hi mimal leh Mizoram tan a tangkai taka chhawr ngei turin a fuih a ni.