Nimin khan Serchhip District Bawrhsap Pu Lalsangliana chuan a office chamber-ah tunhnaia BRTF Camp, Thuampui Aizawla thil thleng chungchangah District Administrative Official te leh tlawmngai pawl hruaitute Emergency Meeting a neihpui.

Bawrhsap chuan Mizote chu a mal a fing fel tak, a huhova kan awma hruaitute rorel ngaichang lova, au ring leh au pawr deuh te thu anga kal mai ching kan ni em aw a tih theih a. Chuvangin hetianga pawikhawihna alo thlen hian thil sual tituin a phu tâwk hremna a hmuh theih nana thuneitute tawiawm mai lova haw hawa thiltih a awm thin hi a pawi a, pawikhawihtute hnamdang an nih phei chuan chi leh chi lam hawi zawnga thulâk mai te hi a awlsamin a hlauhawm a ni ti in, hetiang zawnga buaina a chhuah hian a tuartu ber chu Mizo mipuite kan nih thin avangin a theih ang anga district thuneitute tawiawm thin turin kalkhawm te a sawm a ni.

Lalsangliana chuan tun tum buaina chungchang sawiin, Serchhipah pawh a hlâwma hetiang hnamdang inbâwkkhâwm an awm ve thluah a, he buaina avanga hnam dang hrim hrim hmatiam a, hruaitute zai ngai lem lova hma lo la ve mai kan awm palh ang tih a hlauhawm a, chutiang a thlen loh nana thluak fima hruaituten hma kan lak a ngai a ni tiin tlawmngai pawl hruaitute chu hmalakpuiah a sâwm a ni.

Tlawmngai pawl, YMA, MHIP, MUP leh VC lam te pawhin hetiang lam kawnga DC hmalâkna chu fakawm tiin, thil engkimah dân chhunga hmalâk chu a him ber fo thu te, dân bawhchhiatna a lo awm pawhin haw hawa thuneitute nawr bet lova, thil tisualtuin a phu tâwk hremna a hmuh ngei theihna tura thuneitute thawhpui zawk thin chu a tha ber a ni tiin chutiang a nih theihna tur chuan media hmanga inzirtirna tam zawk neih a tha an ti a ni.

Hetiang thilah hian tlawmngai pawl, a bik takin YMA te pawhin tualchhung chanchinbute mai bakah mahni branch theuha YMA chanchinbuahte hetiang lam inzirtirna hi chhuah tam nise tiin an rel bawk a ni.