Vairengte Community Health Center (CHC)in Kayakalp 2016 a Mizoram pum huapa Community Health Center felfai inelna a lawmman pakhatna a lak chu vawiin khan Vairengte Community Hall-ah lawm a ni a, Serlui bialtu MLA Pu K.Lalrinthanga, Parliamentary Secretary in a hmanpui.

Pu K.Lalrinthanga chuan lawmna inkhawma kal te chibai bukin, Vairengte CHC a hnathawkte leh khawtlang mipuite inpekna leh thawhhona tha chu thil chhuanawm a nih thu a sawi a. Faina in hriselna a kengtel a ni tih hria a, fai hi thupui ber pakhata nei theih turin kalkhawm te a sawm a. Dailenga inthiar awmlohna 'Open Defecation Free' atana hmalakna mekah pawh thuneitute thlawp tha tur a sawm bawk. Lawmna inkhawmah hian District Bawrhsap Pu H.Lalengmawia chu khualzahawm a ni a, Vairengte CHC in faiber lawmman a lak theihna tura CHC a hnathawkte, district chhunga sorkar department hrang hrang te tanhona leh khawtlang mipuite thahnemngaihna chu lawmawm a tih thu a sawi.

Lawmna inkhawm hi Dr.Arun T, SDO Vairengte in kaihruaiin, Dr.C Lalrinchhana, M.O in report a pe a ni. Dr.K.Ropari, Principal Director, Health & Family Welfare chuan he hun hi a hmanpui bawk a. District a official te leh khawtlang mipui thahnem tak an tel bawk.

Vairengte CHC in kayakalp 2016 a Mizoram a CHC felfai ber lawmman a lak theihna a tan hian tlawmngai pawl leh khawtlang mipuiin hnatlanga an pui thin bakah mi thahnemngai tam takin tha leh pawisain an pui bawk a. Deputy Commissioner leh Bialtu MLA in Rs.50000/- ve ve an hlan bawk a ni. Kum 2012 khan Vairengte CHC hian Mizoram puma RSBY a ti tha ber lawmman a lo dawng tawh a ni.