Ministry of Rural Development hnuaia National Rural Livelihoods Mission (NRLM) buatsaih, Community Resource Person (CRP) Conclave  ‘A Learning Forum’ chu September ni 19 leh 20, 2019 khan BP Pal Auditorium, IARI, Pusa, New Delhi ah neih a ni a. He hunah hian India ram hmun hrang hranga khawtlang tana hnathawk tha, Community Resource Person te an kalkhawm a ni. He programme hi Pu Amarjeet Sinha, Secretary, Ministry of Rural Development, Pu Atul Chaturvedi, Secretary, Department of Animal Husbandry & Dairying leh sawrkar a mi pawimawh tak tak dangten an telpui a ni.

He programme ah hian NRLM hnuaia CRP hnathawk thazualte chanchin ziahna tlangzarhna hun hman a ni a. Mizoram State Rural Livelihoods Mission (MzSRLM) hnuaia Livestock Community Resource Person C. Lalawmpuii, Hmuntha khua, Serchhip District ami chu ranvulh kawnga a thawhhlawk avangin DAY-NRLM lehkhabu buatsaihah a chanchin tarlan a ni a, a chanchin tar lanna hun a nei bawk a ni.

MzSRLM hian thingtlang kut hnathawktu hmeichhiate tihchak nan Mahila Kisan Sashaktikaran Pariyojana .(MKSP) project a kalpui mek a, C. Lalawmpuii pawh hi MKSP hnuaia Livestock Community Resource Person niin ranvulh kawnga khawtlang hmasawnnan hma latute zing ami a ni. ‘Best Practicing CRP’ thlannaah hian India rama state hrang hrangten lo neih leh ranvulh kawnga khawtlang hmasawn nan a thawh hlawk zualte an thlang chhuak a, State tin atanga thlanchhuahte chu Ministry of Rural Development hnuaia mi thiamten an zirchiang a, chawimawina dawng tur an thlang thin a ni. Chawimawina dawng tura thlanchhuah te hi NRLM, Ministry of Rural Development-in New Delhi ah a kohin, minute 15 chhung thusawina hun an pe a, an thusawi dan atangin CRP Conclave a thusawi tur an thlangchhuak leh a ni.