Kumin October ni 4 & 5, 2019 chhunga neih tur Anthurium Festival atana hnatlangpui chu Mizoram Tourism Board Vice Chairman Pu TC Pachhunga, Ex MLA hovin vawiin khan Reiek khawtlang leh Tourism Department ten an nei.

Hnatlangpui hawnnaah thu sawiin Mizoram Tourism Board Vice Chairman Pu TC Pachhunga chuan Anthurium Festival chu MNF Sorkar hmasak lai kum 2006 atanga neih tan a ni a, kum 2016 thleng khan kum 10 chhung chu hlawhtling taka neih a ni tih sawiin kum hnih chawlh lailawk a nih hnuah, kuminah a pianna hmun ngeiah neih a ni leh dawn chu lawmawm a ti a. Anthurium par chu Mizoramin a larpui mai a ni lo a, foreign thlenga thawn chhuakin, mi tam takin an hlawkpui mek a ni a ti. Pu T.C.Pachhunga chuan Anthurium Festival chu phuahchawp mai mai a ni lo a, Mizoram sorkar pawisa heu miah lova Sorkar Laipui-in a rawn tum liau liau a ni a; he Festival avang hian khualzinte lakah Mizoram pawh a lar phah tawh hle a ni a ti bawk. A tir atanga Anthurium Festival thlengtu Reiek khawtlang mipuite chungah lawmthu sawiin, kumin October ni 4 & 5 chhunga Festival hman hunah mipui a tam thei ang ber kal turin a sawm a, cultural item hmuhnawm tak chhimpui tur leh zo chaw ngei rawn ei a, ‘Zo khua’ a taka rawn tlawh turin a sawm bawk.

Hawnna hun neih zawhah hian hnatlangpui neih nghal a ni a, Reiek khua leh a chheh vel tihfai runpui neih a ni a, khawtlang mipui leh sikul naupangte an thawkchhuak tha hle a ni.

Mizoram Tourism Board Vice Chairman Pu TC Pachhunga, Ex MLA hi Tourism Department hotute leh Reiek VCP Pu Vanlalchhuanga leh khawtlang hruaituten an tawiawm a ni.