Nimin chawhnu khan Lok Sabha MP Pu C.Lalrosanga'n a chenna in Tuikual South ah tun hnaia 46th National Sub-Junior Basketball Champpionship 2019-Champion Mizoram team leh IDEMITSU Honda Talent Cup 2019 neih mek a CBR150 Category-a Overall Standing a number one leh two te kawmin an hlawhtlinna lawmpuina hun hman a ni.

Pu C.Lalrosanga chuan he hunah hian thusawiin, Mizoram tana mi chhuanawm leh mizoram tihmingtha tu infiammite chu a lawmpui takzet tih a sawi a, infiammite chu tun aia sang zawk leh huam zau zawka invawrhchho zel turin theihtawp chhuah a hmalam pan turin a chah a. Motorsport rider te pawh mizo thalai talent nei tha tak tak te tana hmahruaitu ni a mahni inthununna nen tan la zel tura fuihin, National leh International level thleng phaka an kal chhoh zel theih nan duhsakna a hlan bawk a. An kal leh zel na turah theihtawp chhuahpui a, harsatna an neih te lo ngaihvenpui a tiam a ni.

Mizoram Basketball Association (MBBA) leh Mizoram Motorsports Association hruaitute pawhin he hunah hian an dinhmun sawilangin, Mizo thalaite ruihtheihthil laka an fihlim theihna tur kawng pakhat chu Sports a nih thu leh Sports phena thil pawimawh tak pawh a nih thu an sawi a. Mizo infiammite skills neih that zia leh Sports lamah hei aia sang zawk pawh thleng thei an nih thu an sawi a ni. Infiammite'n harsatna thenkhat an tawh te pawh MP hnenah hian sawiin, sports infrastructure hei aia changtlung zawk an mamawh thu te,  security chungchanga harsatna an tawh thin te leh prize money tam zawk neih theihna tura hmalak saka ngaihtuahpui turin an thlen a ni.

Mizo Basketball player te hian tun tuma an hlawhtlinnaah hian final-ah Punjab hneh in an Champion a. National Record - Inhnehna sang ber Goa lakah an siam a, Goa hi 81-1 in an hneh a ni. Basketball-ah hian Level 1 leh Level 2 siam thar a ni a, kumin hi Mizoram in Level 1 a vawi khat kaina a ni a, an Champion nghal thei hi a lawmawm hle a ni. IDEMITSU Honda India Talent Cup neih mek a Mizo Rider pahnih, K.Lalnunsanga leh Lalrinzuala Tlau te hian September Ni 28-29 hian Final Round an hmachhawn dawn bawk a ni. Basketball Player Lalrina Rethlei chu International player tura thlan a ni a. FIBA 3x3 Kaohsiung Challenger khel turin Taiwan lam an pan dawn a, India aiawhin Panaji (Goa) 3Bl hmingin an khel dawn a ni.