Nimin tlai khan Commerce & Industries Minister Dr. R. Lalthanglian chuan Aizawl Municipal Corporation(AMC) huam chhung leh Aizawl khawpui chhevel leilung him leh him loh zuluk taka zirchianna Report chu Geology & Mineral Resources Office, Aizawl Luangmualah tangkai taka hman turin a tlangzarh a. He project,  ‘DELINEATION OF URBAN DEVELOPMENT ZONES(DUDZ)’ with a special reference to Landslide Risk and Slope Stability : Aizawl City, Mizoram’ hi Geology & Mineral Resources Department Mithiam ten kum 2014 atanga an buatsaih tan a ni a . A senso  Rs 230 Lakh  atanga 90% hi  North Eastern Council(NEC)  tum a ni a, Mizoram Sawrkarin  a dolet nan 10% a tum bawk a ni.

Aizawl Khawpui leh a chhehvel leilung zirchianna lehkhabu pawimawh tak tlangzarh tu, Commerce & Industries Minister Dr R. Lalthangliana chuan kan awmna hmunte, abikin Aizawl khawpui chhung a him tawk loh zia Mipui ten kan hrechiang tana, fimkhur pawh kan fimkhur chho tan zel  tih sawi a. Chhiatrupna lo thleng thulha a sang tel nunna chan theihna leh a sum anga cheng vaibelchhe tam tak chan theihna tur hmunah hian vanduaina kan la tawh loh avanga lo inthlahdah ngawt hi kan tihtur a ni lo a ti. Theih tawpin kan him tlanna turah chuan kan tang tlang anga, mahni remchanna atan ringawta midangte himna kan dahkham te hi kan sim tlan a ngai tih a sawi a. Aizawl khawpui chhung bikah chuan AMC inkaihhruaina tha taka zawm a tul thu te leh Leilung zirchianna leh a kaihnawih thila Sawrkar Department pawimawh tak, Geology & Mineral Resources thuchhuak leh thurawn reng reng te a bo a bang awm lova zawm tlan hi kan himna atana kan tih makmawh a ni tawh a ni a ti. DELINEATION OF URBAN DEVELOPMENT ZONES(DUDZ) chu sawrkar Department zinga ‘works department’ kan tih deuh bik - Land Revenue & Settlement, PWD, PHE, P&E, UD&PA leh a dangte bakah AMC in an hmalakna tur hmun zirchian hmasak nan hmangzel se tih sawrkar chuan a duh  tih a sawi a. He Report hi Aizawl khawpui chhung leh a chhehvela chengte lo him zawkna atana lehkha pawimawh tawp a ni a. He report pawimawh tak siam a lo nih theihna atana Geology & Mineral Resources Department hlawhtlinna chu a chhuanawm tak zet a ni a ti.

‘DELINEATION OF URBAN DEVELOPMENT ZONES(DUDZ)’ with a special reference to Landslide Risk and Slope Stability : Aizawl City, Mizoram’ project hnuaiah hian AMC Ward 19 leh a chhevel bial 7, SqKM 175 a zau huam chhungah zirchianna hmun/bial(Facet) 4124 siam a nia. Heng Facet te hi Satellite Data, Collateral Data leh tehna chi hrang hrang 15 atanga zirchian a ni a. Tehfung, a hniam ber 1 leh a sang ber 10 awmna hmangin Facet/zirchianna hmun te  him dan hi tarlan vek a ni a. Facet/ Zirchianna mual 4124 te hi Hmun him lai - Very Low Hazard Zone (VLH)<3, Hmun him thawkhat-Low Hazard Zone(LH) 3.5-5,  Hmun him tawklo-Moderate Hazard Zone(MH) 5-6.5, Hmun him lo-High Hazard Zone(HH) 6.5-8 and Hmun himlo leh chenna in sakna tlak lo- Very High Hazard Zone(VHH)>10-ah te then hran vek a ni.

‘DELINEATION OF URBAN DEVELOPMENT ZONES(DUDZ)’ tlangzarh Programme hi Pu R. Lalramnghaka, Special Secretary, C&I in a kaihruaia. Report pahnih Pu Lalhmachhuana, Director, G&MR leh Pu R. Zirtluanga, Geologist Senior, Project In-Charge te hnen atanga ngaihthlak a ni a. He hunah hian Pu C. Ramhluna, Vice Chairman, Industrial Development Board, Pu PC Lalhmingthanga, Mayor, AMC, College & MZU mithiamte leh sawrkar mi pawimawh te an tel a ni.