Kumin August ni 29 a New Delhi a Dhyan Chand Award dawngtu, thal kah thiam Pu C. Lalremsanga chu vawiin khan Berawtlang Art & Culture Auditorium ah chawimawina a dawn lawmpuina inkhawm neih a ni. He hun hi Chief Minister Pu Zoramthanga chuan hmanpuiin, MLA Pu K. Pachhunga leh Pu C. Lalmuanpuia leh Board Vice-Chairman Pu K. Liantlinga leh AMC Councillor Pu Rosiamngheta leh andangte an tel bawk.

Chief Minister chuan Pu C. Lalremsanga'n India hmarchhak state atanga a hmasaber ni tura Dhyan Chand Award a dawng chu a lawmpui thu a sawi a. A tumruhna leh a beih nasat zia atang te chuan mipuiin zirchhuah tur an neih thu sawiin, eng hna pawh thawkin kan thil tum chu eng pawh ni se, hlawhtling tlaka kan beih luih a tul thu a sawi a. Kan ram tihhmasawn tur pawhin taimakna nen kan ram kan hnam hi kan thlak danglam thei dawn a ni, a ti.

Pu C. Lalremsanga chuan infiamna khawvela bul a tan dan leh national leh international level intihsiaknaa a tel chhoh dan te sawiin, hlawhtlinna a chan chu tumruhna leh tawngtaina rah liau liau a nih thu a sawi. He hunah hian Sports & Youth Services Director Pu Zothanmawia, United Sport Association of Mizoram (USAM) Sr. Vice President Pu Vanlalsawma leh Pu C. Lalruaia, Pu C. Lalremsanga pa te pawn thu an sawi a ni.

Pu C. Lalremsanga hi kum 1992-2002 chhung khan India aiawihin intihsiakna hrang hrangah telin India tan lawmman engemawzah a lo la tawh a. Kum 1992 Barcelona Olympics leh kum 1996 a Atlanta Olympics ah India aiawhin a tel bakah 1994 a Hiroshima a Asian Games ah leh World Championship panga ah a lo tel tawh bawk. Hemi bakah hian khawvel pum huap intihsiakna engemawzah ah telin, kum 1995 a Delhi a Commonwealth Championships buatsaihah khan team event ah Gold la in, mimal intihsiaknaah Bronze a lo la tawh bawk a ni.

Dhyan Chand Award for Lifetime Achievement in Sports and Games hi Dhyan Chand Award tia kaihthawi niin, India ram chhunga infiammi, an vanglaia hnuhma tha an hnutchhiah avanga chawimawina a ni a. Field Hockey player Dhyan Chand hmingchawia he award hi siam niin kumtin Ministry of Youth Affairs and Sports in a pechhuak thin a. A dawngtu tur hi ministry hnuaia din selection committee in a thlang a. He lawmman hian pawisafai cheng nuai 5 a keng tel a ni. Kumin hian Pu C. Lalremsanga rual hian Dhyan Chand chawimawina hi Wrestler    Manoj Kumar, Table Tennis player Arup Basak, Tennis player Nitten Kirrtane leh Hockey player Manuel Fredricks ten an dawng bawk.

Attachment

  • Loading attachment...