2210/2023-2024

Hnahthial the 8th October 2023: Nimin ni 7 khan Ministry of Road Transport & Highways, Government of India hnuaia NH 54 laih zauh hna thawh mekah hna chak zawka a kal theih nan ram neitu, zangnadawmna (compensation) la tawh, an ram la chhuahsan lo te leh, sawrkar ram lak chhunga in sa thar leh mekte hnenah sawrkarin ram a lak tawhte chhuahsan rang tura hriattirna lehkha (eviction notice) chu Pi Ramdinliani, Lunglei District Bawrhsap, Competant Authority for Land Acquisition (CALA) ni bawk leh Pu Chuauhnuna, Hnahthial Bawrhsap-te chuan ram neitute kal chilhin an pe.

He kawngpui sial nana compensation pek ngaite chu kum 2019 atang khan pek an ni tawh a, hmaih leh tihdik loh palh tlem hmabak la awm tih loh chu ram neituten an dawn tur ang an dawng fel tawh a ni. Ram neitute hnenah hian National Highways Act, 1956 Sec 3E (1) in thuneihna a pek angin CALA, Lunglei District chuan kum 2019, 2020 leh 2021-ah te an ram sawrkarin a lak fel tawhte ni 60 chhunga chhuahsan fel vek turin thupek a lo chhuah tawh a. Heti chung hian vawiin thlenga compensation an lak tawhna ram la chhuahsan lo chhungkaw engemaw zat an la awm a ni. Sawrkarin ram a lak tawh la chhuahsan lo an awm nual avang hian kawngpui siam hna kal lai a muan phah hle a. He thu hian sawrkar laipui beng pawh thleng tawhin Prime Minister hova State tin Chief Secretary-te meeting lo awm tur Praghati-ah pawh sawi ho a ni dawn a ni. Hetiang taka thil pawimawh a nih avang hian sorkar laipui thuneitute chuan CALA leh District Collector tin te a rang lama hma la turin a hriattir a, hemi bawhzui hian DC pahnih-te chuan CALA Lunglei hnuaia awm heng khua, Bungtlang, Rawpui, Pangzawl leh Thiltlang khuate tlawhin hriattirna an pe a ni. He hunah hian DC Office pahniha compensation buaipuitute leh NHIDCL bakah contractor ten an tawiawm a ni.