Zankhat riaka Mizoram rawn tlawha lo zin sawrkar laipui mi pawimawh Comptroller and Auditor General Pu Vinod Rai chuan nimin khan Mizoram University-a Multipurpose Hall a hawng.

 

 

Mizoram University Vice-Chancellor, Prof A.N Rai kaihhruai inkhawm tawi leh urhsun takah hian C&AG chuan Mizoram nuam a tih thu leh Mizoram University Campus changtlung tak a hmuh avanga lawmthu sawi hmasa in, zirna hi kawng tinreng a hmasawnna thlen tirtu anih avangin lehkhabu chhung hriatna piah lamah zir tur leh hriat tur namen lo a awm a, chuvangin hetiang hall tangkai tak tur leh infiamna hrang hrang awmna tur buatsaih a ni hian zirtirtu leh zirlai te tan hmasawnna ropui tak a thlen ngei a beisei pui thu a sawi.

Hawnna inkhawm ah hian Pu Vinod Rai lo tawiawmtu Pu Anupam Kulshretha,  ADAI; Pi Suraj Punhani, Principal Director (RS-2) leh Pu F. Alok, Principal Director to C&AG te pawh an tel a. Pu Benjamina, Registrar, MZU in lawmthu sawina hun a hmang a ni.

Multipurpose Hall hi cheng nuai 362.99 a sak a ni a, mi 1500 an lengin he hall-ah hian Basketball/Badminton court leh Table Tennis court 3 a awm thei a, hmeichhia leh mipa Dressing Room te, Sick Room te,  Store Room 5 te,  toilet te leh Back Stage 2 a awm bawk.

Pu Vinod Rai leh a hote hian tukin khan Accountant General Office leh Staff Quarters sak mek an tlawh zawhin Arunachal Pradesh panin Mizoram an chhuansan.