No.2140/2021-2022
Aizawl, 6th September, 2021 : Vawiin khan Confederation of Indian Industry(CII)chuan Covid-19 hripui laka mi tam zawkin invenna vaccine an lak theih nan an project pakhat, Project Vaccine Nation atangin Mizoram Sorkar ah Covid-19 vaccine dose 1000 lai CII Young India, Mizoram Chapter kaltlangin an pe a. Hei bakah hian hripui tuartu HIV positive chhungkaw 300 chuang tan nutrition an pe tel bawk a. Pu R.Lalramnghaka IAS, Secretary, Health & Family Welfare chuan Dawrpui Multipurpose Hall-ah heng thilpek te hi Mizoram sawrkar aiawhin a lo dawngsawng a ni.

CII hi kum 1895 ah India ram ah ding tanin India ram pumpui a Industry lian leh ropui tak tak te inzawmkhawm pawl lian tak a ni a. India rama Industry a lo than zel theihna tur a policy te duang a, sawrkar nen pawh inthunzawm tlat an ni a. Hetianga hmalakna hi Mizoramah chauh ni lovin India ram hmun hrang hrangah an kalpui a. India ramin kawng hrang hranga hma a sawnna tur atan an thawh hlawkin state hrang hrangah an inzar pharh a. Mizoram ah pawh HIV positive midang tana a hun hmang thin, Pi Vanlalruati chu Women Exemplar Award an hlan tawh nghe nghe a, a hnathawhna kawnga a kut tichak tur atan thawhpui turte zawn sakin kawng hrang hrangin an rawn chhawmdawl bawk a ni.

Vawiina vaccine leh nutrition inhlanna programme hi Christine L.Sailo, Co-Chair YI, Mizoram Chapter in a kaihruai a. Dr.Eric Zomawia, Mission Director, National Health Mission- Mizoram leh Dr. Lalthlengliani, Project Director, MSACS ten thusawina hun an hmang bawk a ni.