No.2141/2021-2022

Aizawl 6th September 2021: September ni 3 leh ni 4 chhung khan Covid-19 Medical Operational Team (MOT) te chu an Chairman Dr. ZR Thiamsanga MLA hovin Mizoram leh Assam ram inrinna a police duty na hmun leh screening point an tlawh.

Screening point an tlawh khua heng Zawlnuam, Kanhmun, Bairabi, Chuhvel leh Luimawi VLTF te nen inkawmhona hun tha tak neiin, hripui an do kawnga harsatna leh mamawh an neih sutkian dan tur te sawiho a ni a. Local Level Task Force te nen inkawm hona tha tak neiin an hriat fiah loh thil te pawh inhrilh fiahna hun hman a ni a. MOT hian Screening point a medical lama thawktu duty te chu fakawm an tih thu te leh Local Level Task Force te inpekna pawh fakawm an ti hle. Heng screening point a VLTF te tan MOT Chairman Dr. ZR Thiamsanga MLA chuan a tul apianga hman turin pawisa fai, mask, damdawi leh thermometer a hlan theuh bawk.

MOT te hian ramri a Mizoram Police duty-na hmun hrang hrang heng- Mitdeli lui, Thinghlun forward duty post, Zophai Base Camp te, Chuhvel Base Camp te pawh tlawhin hmun remchangah Police hotute nen inkawmna hun an nei a.

Dr. ZR Thiamsanga, Chairman MOT chuan sipai te fuihna thu a sawi bakah Mizoram Police ten harsatna hrang hrang an neih te ngaithlain, sawrkarin an harsatna tam tak a sutkian tawh bakah, sawrkar hmachhawp la tihhlawhtlin rih loh te pawh a hlawhtlin thuai theih nan theih tawpa nawrpui a tum thu a sawi a. Ramri a sipai duty te ram leh hnam tana an inpekna pawh a hmun ngeiah an hmuin a fakawm a tih bakah chawimawi an phu hle a a hriat thu a sawiin, sawrkar pawhin ramri a duty te tan theih tawp a chhuah zel tur thu a sawi bawk. MOT te hian ramri a Duty Mizoram Police te hi pawisa fai, Mask, Pulse Oxymeter, Thermometer, Damdawi leh Handsanitizer thahnem tak an pe theuh bawk a ni.

Mizoram Police te chuan Dr. ZR Thiamsanga chu MLA base camp a tlawh avangin lawmawm an tih thu an sawi a ni.