No.2142/2021-2022
Aizawl 6th September 2021: Vawiin khan Mizoram Legislative Assembly Speaker Pu Lalrinliana Sailo hovin MLA rualten Pu Andrew H.Thangliana, Tuirial Assembly Constituency bialtu MLA, vanduaithlak taka kumin August ni 17-a boralta chu a chenna in, Chawlhhmun, Aizawlah ralna hun an hmang.

Ralna programme urhsun taka buatsaih hi Speaker Pu Lalrinliana Sailo chuan a kaihhruai a. Lawngtlai West bialtu MLA Pu C.Ngunlianchunga’n hunserh a hmang a. Home Minister Pu Lalchamliana’n kalkhawmte aiawhin thu a sawi a ni.

Home Minister Pu Lalchamliana chuan Pu Andrew H.Thangliana chu kum naupang tein, MLA candidate a nih vawikhatnaah bial mipuiten duh takin an thlang tling nghal a, a bial mipuite leh ram pawhin a la mamawh em em laia mual a liam ta mai chu pawi a tih thu a sawi a. A awmdan leh thusawi te a lo chik thin thu leh Mizoram tana thil tha duh em em tu, dikna tan tlattu nia a hmuh thu Pu Lalchamliana chuan a sawi a. Ram rawngbawlna hna thawk rei hman lova a liam ta mai chu a mimal tak pawhin a uizia a sawi a ni.

Zoram People's Movement (ZPM) MLA Pu Lalduhoma pawhin thu sawiin Pu Andrew H.Thangliana hian a bial mipuite tan theihtawp a chhuah a, hma nasa takin a sawn a, hmabak eng tak a neih mek laia a hun tawp a hmang ta mai chu a ui takzet tih a sawi a. A bial a enkawlnaah mit a tlung a, hnathawh chhunzawm tur tam tak a hnutchhiah a ni, a ti.

Ralna programme-ah hian Kolasib bialtu MLA, Supply Minister Pu K.Lalrinliana pawhin Kolasib District mipuiin an ui takzet thu a sawi a. A nungchang leh thiltihah tih tak takna nei mi nia a hriat thu a sawi.

Pu Andrew H.Thangliana hi kum 2018 Mizoram Inthlanpuiah khan independent a dingin Tuirial AC-ah MLA atan thlan tlin a ni a. Natna khirh tak veia hun engemawchen enkawl a nih hnuah August ni 17, 2021 khan a boral a. A nupui leh fate pathum a kalsan a ni.

Mizoram Legislative Assembly Secretary Pu H.Lalrinawma chuan Pu Andrew H.Thangliana chhungte hnenah Mizoram Legislative Assembly aiawhin ralna sum cheng nuai 15 a hlan a ni.