Vawiin khan Aizawl khawpui chhunga Local Council 42 te tan Chhiatrupna laka Inrawnkhawmna (Consultation Meeting on Disaster Management Plan For 42 Local Councils) chu I&PR Auditorium-ah neih a ni. He Meeting Key Note Address sawitu Aizawl Bawrhsap Dr. Franklin Laltinkhuma IAS chuan, Mizoram pumpui leh a bikin

Aizawl khawpui chhungah hian chhiatrup theihna laka invenna leh, chutiang hun a thlen palha intanpui thei tura Sorkar Department hotute leh khawtlang hruaituten inbuatsaih tulzia a sawi a. Lirnghing avanga chhiatna rapthlak te, Ruah leh thlipui avanga chhiatna thleng thin: Leimin te, tuilian te, Sabereka khuangkaih avanga thihna thleng thin te; Mihringte fimkhur loh avanga in leh lo chhiatna te pawh a thlen fo thin avangin mitin fimkhur a ngai a; chutiang thil thlen hun apianga chi-ai lova tuartute tanpui thei tura nasa taka inbuatsaih a tul a, Local Council member te, YMA hruaitute pawhin he lama tan lak thar tulzia a sawi a ni. He Meeting-ah hian Aizawl khawpui chhunga Local Council 42 te aiawh mi za rual zet leh Line Department-a Nodal Officer thahnem tak an tel. Aizawl khawpui chhiat hlauhawm dan leh lei chhungril lam zirna atanga lo inbuatsaih a tulzia thu Dr H. Lallenmawia, Joint Director, Geology and Mining-a miin a sawi a. Chumi hnuah Pu Zothansanga Hmar, District Organiser, Aizawl D.C. Office-in hetiang hun atana inbuatsaih dan tur kawng chipchiar taka ruahman chu a sawi bawk. Aizawl City Disaster Management Plan-ah hian Doctor lam te, Engineer te, Police te, Fire Service lam te, Home Guard, Food,Civil Supplies leh Transport lam te, Information lam duty tur te chipchiar takin a sawi a; Vengtin a Local Council leh YMA te kaihhruaina hnuaia hnathawh dan tur chipchiar a zirtir bawk a, kalkhawmten an chhawr ngei a beiseiawm hle a ni.

Chawhnu lamah sawihona neiin, rawtna an neih apiang sawiin, heta kalkhawmte hian zawhna leh chhanna ten en inhrilhfiah a, sawihona hlawk tak hman a ni.

September 12 (Nilaini)-ah Council 40 te tan Chanmary YMA Hall-ah Meeeting neih leh tum a ni.