Vawiin khan Information & Public Relations Department huaihawtin an Conference Hall-ah Mizoram a Film siamtute hmasawnna tur lam inrawnkhawmna “Consultation Meeting on Film in Mizoram” an nei a. Mizoram a film siamtute an kal tha hle.

He meeting hi Information & Public Relations Director Pu Jim K. Chozah in a kaihruai a, tunhnai a Mizoram sorkarin Mizoram Film siamtute hamthatna atan Cheng nuai 10 lai min dah sak avanga sorkar chungah a lawm thu a sawi a.

I&PR Secretary Pi M. Zohmingthangi, IAS in Information & Public Relations Department a Secretary a chelh tirh te a hetia Mizoram Film siamtute nen inhmuhkhawmna hun tha tak a neih avanga a lawmthu sawiin Film in kawng hrang hrang a a tha zawng a mi a zirtir dan te ngaihtuah chunga nasa lehzuala tan la turin a fuih hlawm a. Theihtawp chhuah a an hmasawnna atan a hma lak a inhuam thu a sawi bawk.

Inrawnkhawmna hi Pu Lalsiama Fambawl, Deputy Director in a kaihruai a, member ten hmasawnna tur atana thil tangkai tak tak an sawiho a. Heng an thil sawi hona eng atang hian hmachhawp leh kal dan tur an ngaihtuah leh dawn a ni.

Chief Minister Pu Lal Thanhawla chungah an beisei phak hauh loh bul tanna atan a an pual a cheng nuai 10 lai dah a tum avangin an lawmthu an sawi bawk a ni.

He inrawnkhawmna ah hian member te Aizawl leh Lunglei atangin mi 40 (sawmli) an kal khawm a. Pi Lalnithangi, Joint Director, I&PR in lawmthu a sawi a.Kan hma lawk ah kan kalphung tur chipchiar zawk a duan turin kan in kokhawm leh dawn nia tiin member lo kal zawng zawng duhsak na a hlan bawk.